«Արարատ»-ը կմեկնի ԱՄՆ

Փետրվարի 14-ի վաղ առավոտյան «Արարատ»-ը կմեկնի ԱՄՆ: Կալիֆորնիայում մինչև փետրվարի 24-ը կընթանա թիմի երկրորդ արտասահմանյան ուսումնամարզական հավաքը, որին կմասնակցեն 18 ֆուտբոլիստներ: Այս մասին հաղորդում է ակումբի պաշտոնական կայքը: Փաստաթղթային խնդիրների պատճառով հավաքին չեն մասնակցի դարպասապահ Արման Մելիքսեթյանը, պաշտպան Արամ Շախնազարյանը և կիսապաշտպան Գեորգի Խուբուան: Արդեն ԱՄՆ-ում «Արարատ»-ին են միանալու ամերիկացի կիսապաշտպան Բրայան դե լա Ֆուենտեն, ինչպես նաև` 23-ամյա խորվաթ եզրային կիսապաշտպան Մարին Գլավաշը, ով նախկինում հանդես է եկել խորվաթական «Օսիեկ» և Սլովակիայի «Զլատե Մորավցե» թիմերում, ներկայացրել է Խորվաթիայի երիտասարդական հավաքականը: Հավաքի ընթացքում մեր թիմում կփորձարկվեն նաև այլ պոտենցիալ նորեկներ: Հիշեցնենք, որ ԱՄՆ-ում նախատեսված են երեք ստուգողական հանդիպումներ: Փետրվարի 18-ին «Արարատ»-ը խաղալու է PDL-ում հանդես եկող «Ֆրեզնո Ֆուեգո» թիմի հետ: Փետրվարի 20-ին «Արարատ»-ը կհանդիպի NASL-ի հաղթող «Նյու Յորք Կոսմոս»-ին, որի կազմում մինչև վերջերս հանդես էին գալիս լեգենդար իսպանացի հարձակվող Ռաուլը և Իսպանիայի հավաքականի նախկին կիսապաշտպան Մարկոս Սենան: Ամերիկյան թիմում կան նաև հայազգի ներկայացուցիչներ: Գլխավոր մարզչի օգնականն է ԱՄՆ-ի հավաքականի նախկին ֆուտբոլիստ Ալեկո Իսկանդարյանը, թիմում հանդես է գալիս կիսապաշտպան Հակոբ Չիրիշյանը: Խաղը կկայանա Կալիֆորնիայի Գլենդորա քաղաքի «Citrus College Stadium» մարզադաշտում և կմեկնարկի տեղի ժամանակով 19:00-ին: Երրորդ հանդիպումը նախատեսված է փետրվարի 23-ին: Մրցակցի անունը շուտով հայտնի կդառնա: Հավելենք նաև, որ «Արարատ»-ը հանգրվանելու է Crowne Plaza հյուրանոցում և մարզվելու է Ventura Sportsplex մարզահամալիրում, որտեղ ժամանակին հավաք են անցկացրել Անգլիայի «Վեստ Բրոմվիչ», «Սուոնսի», Շվեդիայի «Համարբյու», ԱԻԿ, ՄԼՍ-ի «Պորտլենդ Թիմբերս» և «Սիեթլ Սաունդերս» թիմերը:   Լուսանկարը՝ թիմի պաշտոնական կայքի: