Գալուստ Սահակյանը հրապարակել է Սերժ Սարգսյանի պլանը
«Ազատություն» ռադիոկայանի եթերում ԱԺ դեռևս գործող նախագահ Գալուստ Սահակյանը, պատասխանելով հարցին, թե 2018 թվականին Սերժ Սարգսյանը կլինի՞ ՀՀ վարչապետ, թե՞ ոչ, տվել է շատ հստակ պատասխան: Գալուստ Սահակյանն ասել է, որ որևէ մեկն այս պահին չի կարող ասել՝ Սերժ Սարգսյանը կլինի վարչապետ, թե չի լինի, ինքը նույնպես այդ հարցի պատասխանը չգիտի. «Բայց ես կարծում եմ, որ Սերժ Սարգսյանը միշտ կլինի: Գուցե որպես վարչապետ կամ մեկ այլ բան կարող է լինել. դա այս պահին չեմ կարող ասել: Բայց Սերժ Սարգսյանը լինելու է և ունենալու իշխանություն»: Թեպետ որևէ մեկը վաղուց այլևս չէր կասկածում, որ Սերժ Սարգսյանը իշխանությունից հեռանալ չի պատրաստվում, և սահմանադրական փոփոխությունների ողջ գործընթացն էլ հենց այդ նպատակով է արվել, սակայն վարչապետ դառնալ-չդառնալու ինտրիգը շարունակում է մնալ օրակարգում: Գալուստ Սահակյանը ՀՀԿ-ում և ընդհանրապես մեր քաղաքական իրականության մեջ այն մարդն է, ում ասածները մշտապես դիտարկվում են հումորի ժանրում: Բայց էլ ինչ հումոր, որը ճշմարտություն չէ: Փաստորեն նա առաջին բարձրաստիճան ՀՀԿ-ականն է, որը պաշտոնապես հայտարարում է, որ Սերժ Սարգսյանը իշխանությունը պահելու է իր ձեռքում: Վերջ՝ սա է կարևորը: Նա կլինի՞ վարչապետ, թե՞ չի լինի, կդառնա՞ ԱԺ նախագահ, թե՞ չի դառնա կամ էլ գուցե կնախընտրի ուժային որևէ նախարարություն, բոլորվին կարևոր չէ: Կարևորը իշխանությունն իր ձեռքում պահելն է: Իսկ Սերժ Սարգսյանը իշխանությունը կպահի, եթե անգամ դառնա ՀՀԿ-ի տատիկը: Ի վերջո կարևորը այն հնրավորություններն ու լիազորություններն են, որ կտրվեն տատիկին: Իսկ այդ լիազորությունները սահմանում և տալիս է կուսակցությունը՝ հարազատ ՀՀԿ-ն, որտեղ Սերժ Սարգսյանն ունի անսահման իշխանություն և միանձնյա որոշումներ կայացնելու լայն հնարավորություն: Ի վերջո Սերժ Սարգսյանը վարչապետ կարող է և չլինել, այլ ընդամնեը կարող է լինել օրինակ ուժային կառույցները համակարգող պետնախարար, որի հետ վարչապետը պարտավոր կլինի քննարկել և համաձայնեցնել բոլոր կարևոր և անկարևոր հարցերը: Նման հաստիք, իհարկե, առայժմ չկա, բայց դա չի նշանակում, որ չի կարող լինել: Վերջապես, եթե վարչապետը, անկախ նրանից թե նա ով կլինի, ամեն մի հարցը չհամաձայնեցնի կամ Սերժ Սարգսյանի ցուցումով չկատարի, ապա ԱԺ-ում նստած ՀՀԿ-ականները Սերժ Սարգսյանի մի մատի շարժումով պաշտոնակ կանեն վարչապետին էլ, կառավարության անդամներին էլ: Այնպես որ գլխավոր մարմինը պոլիտբյուրոն է՝ ՀՀԿ ԳՄ-ն, որի նախագահը ինչպես այսօր, այնպես էլ վաղը լինելու է Սերժ Սարգսյանը: Մնացածն արդեն տեխնիկական հարցեր են: Վերադառնալով Գալուստ Գրիգորչին՝ նշենք, որ նրա քաղաքական ապագան կարծես թե անհայտ է: Երբ լրագրողը նրան հարցրեց՝ եթե Ձեզ առաջարկվի ԱԺ նախագահի պաշտոնը, կհամաձայնվե՞ք, առանց մի վայրկյան տատանվելու պատասխանեց. «Իհարկե կհամաձայնվեմ: Ու՞մ առաջարկեն, որ չհամաձայնվի»: Խոստովանենք, ամեն դեպքում Գրիգորիչը պետք է ԱԺ-ին՝ անկախ նրանից նա կլինի ԱԺ նախագահ, թե չի լինի: Ճիշտ է, նա վերջերս հայտարարեց, որ իրեն պետք չի ընկալել որպես Գալուստ Սահակյան: Բայց միևնույնն է, ինչպես էլ ընկալես, ուրիշ բան չի ստացվում, որովհետև ինքը հենց Գալուստ է, որ կա: Արման Վարդանյան
Հետևեք մեզ Viber-ում
