Արտակարգ դեպք Կոտայքի մարզում

Այսօր՝ ապրիլի 13-ին, խոշոր հրդեհ է տեղի ունեցել Կոտայքի մարզում։ Ժամը 10։50-ի սահմաններում Երևան-Սևան ավտոճանապարհի Չայնիի ոլորաններում դեռևս անհայտ պայմաններում հրդեհ է բռնկվել 41-ամյա Ֆեդերիկո Դուցիոնիի վարած Mercedes ML մակնիշի 055 DD 10 համարանիշի ավտոմեքենայում։ Ինչպես դեպքի վայրից հայտնում է ֆոտոլրագրող Գագիկ Շամշյանը, դեպքի վայր են ժամանել Արտակարգ իրավիճակների նախարարության Փրկարար ծառայության Չարենցավանի հրշեջ-փրկարարական ջոկատը՝ 1 մարտական հաշվարկով՝ 3-րդ հերթափոխի հրամանատար Հայկ Ասատրյանի և տեղակալ Աշոտ Սողոմոնյանի գլխավորությամբ։ Հրշեջներն ու քաղաքացիները մարել են Mercedes-ում առաջացած հրդեհը, սակայն Mercedes-ը վերածվել է մոխրակույտի։ Դեպքի վայր են ժամանել Ճանապարհային ոստիկանության 2-րդ սպայական գումարտակի 3-րդ վաշտի 1-ին դասակի աշխատակիցները՝ վաշտի համանատար Արթուր Պետրոսյանի, հրամանատարի տեղակալ Երվանդ Ալեքսանյանի և դասակի հրամանատար Հրանտ Գալստյանի գլխավորությամբ։ Դեպքի մասին ՃՈ օպերատիվ կառավարման կենտրոնի պատասխանատու հերթապահ Արսեն Հարությունյանը տեղեկությունը փոխանցել է ոստիկանության Չարենցավանի բաժին, որտեղից ժամանել է օպերատիվ խումբը։ Գ. Շամշյանի տեղեկություններով՝ բարեբախտաբար զոհեր և վիրավորներ չկան, իսկ վարորդ Ֆ. Դուցիոնին ազգությամբ իտալացի է, մասնագիտությամբ ինժեներ է և Հայաստանում իտալական ինչ-որ կազմակերպության հետ զբաղվում է ճանապարհաշինարարությամբ։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: