Ալեքսեյ Նավալնիին ազատ են արձակել

Ռուսական լրատվամիջոցների փոխանցմամբ, ազատ է արձակվել 15 օրով ազատազրկման դատապարտված ընդդիմադիր գործիչ Ալեքսեյ Նավալնին: Հիշեցնենք, որ նրան ձերբակալել էին մարտի 26-ին տեղի ունեցած ցույցի ժամանակ ոստիկանության աշխատակցի հրահանգներին չենթարկվելու համար: Քաղաքական գործիչը նաև տուգանվել է 20 հազար ռուբլու (մոտ 350 դոլար) չափով: Բողոքի ակցիայի ժամանակ Նավալնիի աջակիցները բողոքել են Ռուսաստանի վարչապետ Դմիտրի Մեդվեդևի դեմ՝ մեղադրելով նրան կոռուպցիայի մեջ: Նավալնիի հրավիրած բողոքի ակցիան կանխել է ոստիկանությունը՝ կատարելով ռեկորդային թվով ձերբակալություններ: Մոնիթորինգային խմբերի հաղորդմամբ՝ ձերբակալվել է 1030 մարդ: Ակցիայից առաջ համացանցում էր հայտնվել Նավալնիի ֆիլմ-հետաքննությունը, որտեղ նա պնդում էր, որ Մեդվեդևը ոչ առևտրային կազմակերպությունների ցանցի միջոցով Ռուսաստանում և արտասահմանում բազմաթիվ շքեղ անշարժ գույքի սեփականատեր է հանդես գալիս: