««Ելքը» ելք չի առաջարկում». Աշոտ Եղիազարյան

Տնտեսագետ Աշոտ Եղիազարյանը կարծում է՝ «Ելք» դաշինքի կողմից առաջարկվող՝ Եվրամիության հետ ազատ առեւտրի գոտու պայմանագիր ստորագրելը Եվրասիական տնտեսական միությանն անդամակցության պայմաններում վտանգավոր է,այս մասին վերջինս նշեց լրագրողների հետ հանդիպմանը: «Բայց նրանք առաջարկում են Եվրոպական միության հետ ազատ առեւտրի գոտու վերաբերյալ համաձայնագիր կնքել, ինչը հակասում է ԵՏՄ-ին Հայաստանի անդամակցությանը։ Դա նշանակում է, որ նրանք հաշվարկում են ժամանակը՝ սպասում են, երբ ԵՏՄ-ն կփլուզվի, եւ մենք համապատասխան համաձայնագիրը կնքելու հնարավորություն կունենանք։ Դա վտանգավոր է եւ կարող է այլ արդյունքի հանգեցնել։ Այսինքն՝ «Ելք»-ն իրականում ելք է առաջարկում ստեղծված դրությունից», – շեշտեց բանախոսը: Հարցին՝ Ձեր կարծիքով՝ ո՞վ, ինչո՞ւ և ինչպե՞ս է Արցախի հարցում Հայաստանին զիջումներ պարտադրելու, Ա. Եղիազարյանն այսպես պատասխանեց. «Այսօրվա պայմաններում՝ որպես շահագրգիռ, օրակարգ առաջարկող կողմ՝ ես տեսնում եմ Մոսկվային, որը շատ է շահագրգռված: Մոսկվան թե՛ Ադրբեջանում, թե՛ Վրաստանում չունի մեծ ազդեցություն: Նրա ազդեցությունը Հարավային Կովկասում Հայաստանում  է հիմնականում մնացել: Լավ հասկանում եմ, որ աշխարհաքաղաքական իրավիճակը փոխվում է սևծովյան, կասպյան տարածաշրջանում, ԱՄՆ-ը և ԵՄ-ն ուժեղացնում են իրենց ազդեցությունը, և վաղ թե ուշ Ռուսաստանին քաղաքական, տնտեսական ռեսուրսները չեն բավարարելու մնալ այս տարածաշրջանում, և Ռուսաստանը, բնականաբար, պետք է փորձի մնալու հետ կապված հարցերը լուծել Հայաստանի միջոցով, որովհետև ամենաշատն իրենից կախված է Հայաստանը, ու այստեղ ամենազգայուն հարցը և ամենակարևոր գործիքն Արցախի խնդիրն է: Ռուսաստանը պետք է փորձի անընդհատ հսկողության տակ պահել այդ խնդրի կարգավորումը: Իսկ ցանկացած կարգավորում նշանակում է՝ Հայաստանին ստիպել զիջումներ: Քանի որ Հայաստանը խորհրդարանական ընտրություններից դուրս եկավ ինքնիշխանությունն էլ ավելի կորցրած, բնականաբար,  փորձ կարվի Հայաստանից ավելի շատ զիջումներ կորզել ու Հայաստանի առջև ավելի վստահորեն առաջ քաշել պայմաններ»: