Գեներալների ժամանակն ավարտվեց

Ապրիլի 2-ի ընտրությունները մարզերում գրեթե ռազմավարական նշանակություն ունեին տեղական իշխանիկների՝ մարզի ռեյտինգային թեկնածուների համար: Այդ օրը փաստացի ամրագրվեց յուրաքանչյուրի քաշը, մարզում ազդեցության սահմանը՝ վախի կամ հարգանքի գործոնով գծած: Այս առումով անչափ հետաքրքրական են Արմավիրի մարզի արդյունքները: Արմավիրը գրեթե միշտ համարվել է Հայաստանի խնդրահարույց տարածքներից մեկը, քանի որ այդ մարզի, այսպես կոչված, էլիտան ձեւավորում է գեներալիտետը՝ Սեյրան Սարոյանի ու Մանվել Գրիգորյանի գերդաստանները: Այս մարդկանց թուրը աջ ու ձախ է կտրում, երբեք չի վրիպում, նրանց կարելի է ամեն ինչ, այս շերտի հանդեպ ամենաթողությունը մարզում ու հատկապես Էջմիածին քաղաքում ծնել է բեսպրեդելություն, անպատժելիություն: Քչերն են համարձակվում նրանց դեմ դուրս գալ, որպես հետեւանք՝ նվազագույնը ծեծուջարդ, կրակոցներ, այս ամենն անխուսափելի է: Արմավիրի համայնքապետերը տարբեր ժամանակներում անանուն նամակներ են ուղարկել Բաղրամյան 26՝ խնդրել-աղաչել՝ իրենց ազատել գեներալների լծից ու հատկապես մանվելիզմից, բայց իշխանությունը հասկանալի պատճառներով ընթացք չի տվել, Արմավիրում չի տապալել և չի տապալում այս մարդկանց իշխանությունը, պարզապես ժամանակ առ ժամանակ նրանց դեմ այլընտրանքներ է առաջ բերում: Վերջին ժամանակների այլընտրանքը Դոն Պիպոն է… Այս իրավիճակում ապրիլի երկուսի ընտրությունների արմավիրյան արդյունքները խորհրդանշական են: Մարզն ընդգրկող թիվ 6 ընտրատարածքում ՀՀԿ-ական ռեյտինգային թեկնածուներից ամենաշատ ձայներ ստացած թեկնածուն Նահապետ Գեւորգյանն է՝ Նովոն, 22 հազար 64 ձայն։ Հաջորդը գեներալ Սեյրան Սարոյանն է՝ 21 հազար 937 ձայն, ճիշտ է երկու թեկնածուների ձայների տարբերությունը չնչին է, բայց սա այն դեպքն է, երբ մեկ ձայնի առավելությունն ինքնին եղանակ է փոխում՝ հաստատելով մարզի փաստացի <<ասողի>> տիտղոսը: Շատերի մոտ կասկած չէր հարուցում, որ Սարոյանը լիակատար հաղթանակ է տանելու, բայց արդյունքները այլ բան ցույց տվեցին: Նահապետ Գեւորգյանի համար ուժերը չէր խնայում Արմավիրի քաղաքապետ Ռուբիկ Խլղաթյանը, որը Ռուբեն Հայրապետյանի հարազատն է ու կրիմինալի հետ սերտ կապեր ունի: Գեներալ Սարոյանի համար մարզային ուժերը գեներացրել էր Մանվել Գրիգորյանը, որի հակարդյունքը չուշացավ ու հանրության շրջանում առավել ընդունելի, ասող-խոսող, հումորով գեներալը ստացավ քիչ ձայներ, քան ավելի դաժան վարք ունեցող Նովոն: Ռեյտինգային մյուս թեկնածու Ալեքսան Պետրոսյանի՝ ՄԱՊ-ի Ալիկի օգտին քվեարկել է 9 հազար 474 ընտրող: Առաքել Մովսիսյանը՝ Շմայսը, պարտություն է կրել: Նրա օգտին գրանցվել է 6 հազար 716 ձայն: Գեներալ Մանվել Գրիգորյանի հորեղբորորդի Հրանտ Գրիգորյանն ստացել է 4 հազար 862 քվե: ՄԱՊ-ի Ալիկի օգտին վարչական ռեսուրսներն ապարդյուն ուղղորդում էր մարզպետ Աշոտ Ղահրամանյանը, որի ագահության ու դրանից բխող գործունեության մասին մարզում լեգենդներ են հյուսվել, դրա արդունքն էլ գործարար թեկնածուի քիչ ձայներն են: Այնինչ Ալիկ Պետրոսյանը այս թեկնածուներից միակն է, որը մարզում սոցիալական հարց է լուծում, հարյուրավոր աշխատատեղեր ապահովում: Շմայսի պարտության առիթով կարելի է շնորհավորել հայ ժողովդրին՝ սպասելով խորհրդարանում նրա արժանի փոխարինողին: Անակնկալը Հրանտ Գրիգորյանի ցուցանիշն է, նա թշնամական հարաբերություններ ունի Մանվել Գրիգորյանի հետ ու բոլոր ընտրություններին դիտարկվել է իբրեւ այլընտրանք: Անի Սահակյան