Թիմի ամբիցիան

ՀՀ ֆինանսների նախարար Վարդան Արամյանն այսօր կառավարության նիստին հայտարարեց, որ 3.2 տոկոս տնտեսական աճն իրենց թիմի ամբիցիան չէ, և միջնաժամկետում հավակնում են ունենալ շատ ավելի բարձր տնտեսական աճի ցուցանիշներ:  «Շատ կարեւոր է, որ մենք հավելյալ միջոցներ ուղղենք կապիտալ ծախսերին: Մենք ունեցել ենք քննարկումներ, որպեսզի նախապատվությունը տանք այն ծրագրերին, որոնք կապիտալ բնույթի են: Շուրջ 98 միլիոնի չափով մենք առանձնացրել ենք այն ծրագրերը, որոնք այս տարի իրականացնելու ենք»,- ասաց նա: Վարդան Արամյանը նշեց, որ թեև առանձնացրել են շուրջ 98 միլիոնի չափով այն ծրագրերը, որոնք կարելի է այս տարի իրականացնել, սակայն պետք է նաև հաշվի առնել, որ դա որոշակիորեն ազդում է պարտքի և դեֆիցիտի ցուցանիշի վրա։ Անդրադառնալով հարկահավաքման ցուցանիշին՝ նշեց. «Առաջին եռամսյակում մենք 1 տրիլիոն 135 միլիարդի ծրագիր գերակատարել ենք: Ծրագիրը գերակատարել ենք 11,5 միլիարդ դրամով: Մենք կարծում ենք, որ մոտ 50 միլիոնով մենք կարող ենք ավելացնել հարկային եկամուտները»: Այնուհետև վարչապետն ասաց. «Այս լուծումը մեզ մոտ նախապատրաստված էր մինչեւ ընտրությունները: Մենք այս քայլին գիտակցաբար գնում ենք ու հատուկ ընտրություններին հաջորդող կառավարության նիստին ենք ասում, որ որևիցե մեկը չմտածի, թե մենք պոպուլիզմով ենք զբաղված։ Մենք շատ լավ գիտակցում էինք, որ ՊԵԿ-ի առջև դնում ենք լուրջ խնդիր»։