Ձեզ դուր չի գալիս, մի նայեք․վարչապետը՝ հնդկական սերիալների մասին/տեսաշար/

Մալաթիա-Սեբաստիա վարչական շրջանում գտնվող «Հայաստան» կինոթատրոնում կայացավ ՀՀԿ-ի նախընտրական հանդիպումը բնակիչների հետ, ներկա էին վարչապետը, ՀՀԿ համամասնական ցուցակի եռյակի առաջատարները, բացառությամբ Վիգեն Սարգսյանի։ Ներկա էր նաեւ այդ ընտրատարածքում ռեյինգային ընտրակարգով առաջադրված Սամվել Ալեքսանյանը։ Վարչապետին հարցեր ուղղեցին երիտասարդ ընտանիքների համար հատկացվող բնակարանների ծրագրի, աշխատավարձի բարձրացման, նախկին գործարանների վերագործարկման մասին։ Վարչապետն ասաց, որ հին գործարանները ոչ մեկին այլեւս պետք չեն, «աշխարհը փոխվել է»։ Հարց հնչեց հեռուստատեսության որակի մասին, մասնավորապես հնդկական սերիալների, Կարեն Կարապետյանն առաջարկեց հետեւել հեռուստադիտողների շրջանում անցկացված հետազոտություններին․ «Եթե մի քաղաքացին ուզում է հնդկական սերիալ նայի, ուրեմն պետք է նայի, եթե ձեզ դուր չի գալիս, մի նայեք։ Ես չեմ կարող պարտադրել, ասել՝ դա ցույց մի տվեք, որովհետեւ ինձ դուր չի գալիս»,-ասաց Կարապետյանը՝պատասխանելով բնակչուհու հարցին։ Ի դեպ, այդ բնակչուհին իր հարցերը ձայնագրում էր, որպեսզի 10 տարի անց «վարչապետին հիշեցնի իր տված պատասխանները»։ Հանդիպմանը ներկա մշակույթի գործիչներից մեկն էլ բարձրացրեց իրենց ոլորտի խնդիրների մասին՝ ասելով, որ արտերկրում ավելի մեծ հաջողություններ են կարողանում գրանցել, քան ՀՀ-ում։ Դժգոհեց՝ցուցահանդեսներին Մշակույթի նախարարությունից մի ներկայացուցիչ անգամ չի գալիս, վարչապետն էլ զարմացավ՝ չինովնիկը գալու է ի՞նչ անի, դրանից ձեր գործքերը վաճառվելո՞ւ են։ Ուշագրավ է, որ դահլիճում ներկա էր ՀՀԿ-ի ֆրանսիացի մի համակիր, որի թարգմանիչը փոխանցեց ասելիքը, ըստ որի վերջինս աջակցում է ՀՀԿ-ին՝ դեռ 88-ի երկարաշարժից հետո։ Ինչպես նաեւ ասաց, որ նկատել է Հայաստանի զարգացման եվրոպամետ ուղղվածությունը, ինչի համար շնորհակալ է։ Իսկ խոսքի վերջում ֆրանսիացի համակիրը, ըստ հյուրընկալության մասին Հայաստանի ավանդույթի, հայկական գինի նվիրեց Կարեն Կարապետյանին։ Հանդիպման վերջում վարչապետը կոչ արեց ընտրել ՀՀԿ-ին ու իրենց ռեյտինգային թեկնածուներին՝ թիմով արագ հեռանալով դահլիճից։ Սեդա Ղուկասյան