Կառույցներ կան, որ պետությունը պետք է գուրգուրելով պահի.ճարտարապետ

Ճարտարապետ Հրաչիկ Պողոսյանը Հայելի ակումբում հրավիրված ասուլիսում նկատեց . «Ես մինչև հիմա զարմացած եմ, թե այդ ո՞վ էր մեր Կառավարությունում այն մարդը, ով հավանություն տվեց Մարզահամերգային համալիրի նմանօրինակ վաճառքի ծրագրին: Մի՞թե կարող է պատահի, որ Կառավարության համակարգում լինի մի մարդ, որն այնքան անփորձ կամ անխելք կլինի, որ այդ հսկայական շենքը կվաճառի մի սրիկայի, ում մասին, ինչպես ասում են՝ քրեական հետախուզության մեջ է: Եթե մեր Կառավարությունում նման գործարքներ պետք է կատարվեն, ուրեմն՝ եկեք այսօրվանից համարենք, որ այլևս ոչ մի հույս չկա»: «Կառույցներ կան, որ պետությունը պետք է գուրգուրելով պահի, որովհետև դա իմը չի, քոնը չի, դա ժողովրդինն է, չնայած մենք մի ամբողջ կյանք ենք դրել այդ կառույցների ստեղծման վրա: Չե՞ք նկատել՝ որ կառույցը հանձնեցին սեփականատիրոջը՝ կրակն ընկան, քանդեցին «Երիտասարդական պալատը», մետաղները վաճառեցին ու նստեցին տեղները, նայեք, թե ի՞նչ է կատարվում «Ռոսիա» կինոթատրոնի հետ՝ դարձրել են քրջուփալաս վաճառելու մի տարածք»,- սրտնեղած բարձրաձայնեց  Ֆերդինանդ Առաքելյանը : Ճարտարապետ Հրաչիկ Պողոսյանն այս թեմայի առնչությամբ նշեց, որ ինքն արդեն մեկ տարուց ավելի չի առնչվում կինոթատրոնի սեփականատիրոջ՝ Խաչատուր Սուքիասյանի հետ՝ մեկնաբանելով, որ վերջինս որևէ կերպ չի արձագանքում իր կողմից կառույցի վերականգնման նպատակով որոշակի քայլեր ձեռնարկելու բազմաթիվ առաջարկներին. «Չե՞ք տեսնում՝ բոլոր կողմերից այնպես են խեղդել կինոթատրոնի շենքը, որ այն արդեն ոչ միայն վաղուց կորցրել է իր բուն գործառույթը, այլև, գտնվելով վթարային վիճակում, այլևս որևէ հույս չի ներշնչում»: