Եթե իշխանությանը հայհոյում ես, նա էլ կհայհոյի. ԲՀԿ պատգամավոր/տեսանյութ/

Այսօր՝ փետրվարի 12-ին «Հենարան» մամուլի ակումբում հրավիրված ասուլիսի ժամանակ ԲՀԿ խոսնակ Վահան Բաբայանն ուշագրավ հայտարարություն արեց: Նա նախ նշեց, որ ԲՀԿ-ն առաջին ընդդիմադիր խմբակցությունն է խորհրդարանում և եթե չեն հայտարարում`«ռեժիմ հեռացիր», չի նշանակում, որ ընդդիմադիր չեն: «Եթե կողմ ենք քվեարկում բյուջեին, չի նշանակում, որ ընդդիմադիր չենք»,-ասաց Բաբայանը: Բաբայանը ընդգծեց, որ ԲՀԿ-ում ֆորսմաժորային իրավիճակներ չկան: Բաբայանի փոխանցմամբ`իրենք պատրաստվում են առաջիկա խորհրդարանական ընտրություններին և անպայման ներկայացված են լինելու խորհրդարանում: «Ամեն ինչ նորմալ ընթանում է առաջ և լրջորեն պատրաստվում ենք առաջիկա խորհրդարանական ընտրություններին: Մենք ասել ենք, որ գլխավոր թեստը լինելու է խորհրդարանական ընտրությունները, որը կլինի անցումային ժամանակաշրջան»,-ասաց նա: Ըստ Բաբայանի՝ ԲՀԿ-ն ունի իր ծրագրերը, մոտեցումները թե՛ ներքաղաքական և թե՛ արտաքին քաղաքականութանն առնչվող հարցերում: ԲՀԿ պատգամավոր  Միքայել Մելքումյանն էլ հայտարարեց, որ ընդդիմության մասին կարծիքը պետք է փոխվի: «Հրապարակում գոռալը քաղաքական զինանոցի մի մասն է, որը օգուտ չի տալիս, պետք է նաև իշխանության հետ երկխոսել: Եթե իշխանությանը հայհոյում ես, նա էլ կհայհոյի»,- ընդգծեց Մելքումյանը: ԲՀԿ պատգամավոր Միքայել Մելքումյանը նկատեց, թե քաղաքական վերադասավորումներ են գնում և՛ իշխանական համակարգում, և՛ ընդդիմադիր դաշտում: «Իհարկե, ոչ իշխանական ուժերում էլ կգնան որոշակի բյուրեղացումներ, բայց լավ կլինի ծրագրային հենքի վրա լինի: Իսկապես ԲՀԿ-ն էլ գնում է 17 թ-ի ընտրություններին, և, իմ կարծիքով, ամենայն հավանականությամբ, կգնա որպես առանձին քաղաքական ուժ և կունենանք պատկառելի ներկայացվածություն»,-եզրափակեց ԲՀԿ պատգամավորը: Աստղիկ Ավագյան