Արկադի Համբարձումյանը (Դերժավայի Արկադին) 29 միլիոն դրամով ավտոմեքենա է գնել

ԱԺ ՀՀԿ խմբակցության պատգամավոր, Լոռու մարզն ընդգրկող թիվ 9 ընտրատարածքում ռեյտինգային ընտրակարգով առաջադրված Արկադի Համբարձումյանը, որն առավել հայտնի է Դերժավայի Արկադի մականունով 2016 թվականին 29 միլիոն 949․000 դրամով ձեռք է բերել LEXUS LX 5.7GAS մակնիշի ավտոմեքենա։ Այս մասին տեղեկանում ենք բարձրաստիճան պաշտոնատար անձանց էթիկայի կայքից։ Համբարձումյանի դրամական միջոցները 2016-ին կազմել են 156 միլիոն 690․000 դրամ։ Ուշագրավ է, որ նույն հարկային տարում Համբարձումյանը 350․000 դրամով վաճառել է TOYOTA LAND CRUISER PRADO 2.7 I մակնիշի թանկարժեք ավտոմեքենան։ Ըստ հայտարարագրի՝ ավտոմեքենան օտարվել է այդքան գումարով, սակայն ըստ երեւույթին պատգամավորի հայտարարագիրը թերի է լրացվել, որովհետեւ այդ մեքենան ինչքան էլ վնասված լիներ, նման գնով չէր կարող վաճառվել։ Անդրադառնանք ԱԺ պատգամավորի եկամուտներին․ այն կազմել է 449 միլիոն, որից աշխատանքի վարձատրությունն է շուրջ 5 միլիոն, նվիրատվության կամ օգնության կարգով ստացված դրամական միջոցները 443 միլիոն։ Տեղեկացնենք, որ պատգամավոր ընտրվելու տարին՝ 2012-ին, Արկադի Համբարձումյանի դրական եկամուտները եղել են շուրջ 7 միլիոն 124․000 դրամ։