Փորձեցին «գրավել» կառավարության շենքը/տեսանյութ/

Եկմալյան փողոցի նախկին բնակիչները պատրաստ են ծայրահեղ քայլերի: Փետրվարի 11-ին Կառավարության հերթական նիստի օրը նրանք փորձեցին ներխուժել Կառավարության շենք: Ոստիկանները գործեցին արագ: «Անտեր ժողովրդին չեք ընդունում, թույլ չեք տալիս մտնել ներս: Մենք ուրիշ ելք չունենք: Ուղիղ տասը տարի է`տները քանդել են, ոչ գումարն են տալիս, ոչ էլ տեղեկացնում, թե երբ են գումարը տալու: Կառավարության ներսում չգիտենք՝ ինչ են անում, ժողովրդին հուզող ոչ մի խնդիր չի լուծվում: Մենք ամեն հինգշաբթի գալիս ենք էստեղ ու որևէ բան չի փոխվում, չեն ընդունում: Արհամարհված ենք ու մենք էլ կարող ենք զայրանալ»,-բղավում էր Եկմալյան շենքի բնակչուհիներից Լուսինե Սահակյանը: Բնակիչները տեղեկացրին, որ Գործադիր մարմնի հաջորդ նիստի օրը նստացույց են սկսելու: Նշենք, որ տասը տարի առաջ  քանդվել են Եկմալյան 4-16 շենքերը ու բնակիչները այս պահին հայտնվել են դրսում: Այդ շենքերի բնակարանները ժամանակին կառավարության որոշումներով ներառված էին գերակա շահի տակ ընկած տարածքներում՝ այլ կառուցապատումների համար: Բնակիչները նշել էին, որ պատրաստվում են ծայրահեղ քայլերի դիմել:Նրանք հայտարարել էին, որ վրաններ կտեղադրեն Պուշկին-Եկմալյան խաչմերուկում և այդպիսով կխաթարեն երթևեկությունը: Եկմալյանի բնակիչները դիմել են նաև ՀՀ նախագահ  Սերժ Սարգսյանին: Նրանք փաստում են, որ արդեն 10 տարի անհայտ ճակատագրի կրող են  դարձել. « Ինչքա՞ն կարելի է փողոցում հայտնվել երեխաների հետ: Ասում են՝ սպասեք: Ինչքա՞ն սպասենք: Տասը տարի է՝ սպասում ենք: Դիմել ենք վարչապետին, ԱԺ նախագահին, խոսել ենք, խոստացել են հարցերը լուծել: Էլ ո՞ւմ հետ խոսենք… Բայց ոչինչ չի լուծվում»: Աստղիկ Ավագյան Մանրամասաները` տեսանյութում: