Լարված իրավիճակ Կոտայքի մարզում. ՖՈՏՈՌԵՊՈՐՏԱԺ

Երեկ՝ մարտի 19-ին, լարված իրավիճակ էր ստեղծվել Կոտայքի մարզի Չարենցավան քաղաքում: Նախ` քաղաքի կենտրոնում, ինչպես իրենք՝ չարենցավանցիներն են նշում, «Կինոյի» մոտ հավաքված մոտ 35 մեքենաների վարորդները իրենց դժգոհությունն արտահայտեցին ԱԺ նախկին ԲՀԿ-ական պատգամավոր Ռոբերտ Թովմասյանին պատկանող գազալցակայանից: Մասնավորաբար, նրանք ասում էին, որ չնայած 1 մետր խորանարդ գազի համար սահմանված է 165 դրամ, որն ամենացածրերից է հանրապետությունում, թեյավճար չկա, սակայն իրենց վրա մի քանի անգամ շատ են հաշվում գինը, իսկ գազի ծավալը լինոմ է նորմայից մի քանի անգամ նվազ: Այնուհետև վարորդները գնացին գազալցակայան, որպեսզի հանդիպեն տնօրինության հետ: Այդ պահին Ռ. Սահակյանը հեռացավ գազալցակայանից, իսկ վարորդները պնդեցին, որ մինչև չհանդիպեն վերջինիս հետ և հարցը լուծում չստանա, այդտեղից չեն հեռանա: Վարորդների ինքնաբուխ ակցիային միջամտեց ՀՀ ոստիկանության Չարենցավանի բաժնի պետ Սամվել Տոնոյանը, ով ոստիկանական ուժեր կանչեց և պահանջեց, որ վարորդներից յուրաքանչյուրը իր մեքենայով հեռանա այդտեղից կամ ներկայանա ոստիկանություն և գրավոր դիմում ներկայացնի: Որոշ ժամանակ հետո վարորդների մի մասը հեռացավ, իսկ մյուսները Ս. Տոնոյանի հետ գնացին ոստիկանության Չարենցավանի բաժնի մոտ, որտեղ վերջապես հանդիպեին Ռ. Սահակյանի հետ: Հարցուպատասխանի ընթացքում վարորդները պնդեցին, որ գազալցակայանում իրենց խաբում են, իսկ Ռ. Սահակյանը՝ եթե չեն ուզում, թող այլ տեղ լիցքավորեն: Վարորդների և նախկին պատգամավորի զրույցը այդպես էլ արդյունք չտվեց, նրանք ընդհանուր հայտարարի չեկան: Վերջում վարորդները խնդրեցին համապատասխան պատկան մարմինների միջամտութունը՝ իրենց առաջ քաշած խնդրին: Լուսանկարները՝ Սմբատ Պետրոսյանի