Մարզպետի օգնականը 6 մլն, թե 3 մլն կաշառք է ստացել տնօրեն նշանակելու դիմաց

SHAMSHYAN.com-ի տեղեկություններով՝ երեկ՝ մարտի 16-ին, Շիրակի մարզի դատախազությունից ոստիկանության Շիրակի մարզային վարչություն է փոխանցվել Գյումրի քաղաքի Շիրակացու փողոցի 203 շենքի բնակչուհի Գոհարիկ Շահբազյանի դիմումը, որով նա հայտնել է, որ 2016 թ.-ի նոյեմբերի 14-ից մինչև նոյեմբերի 16-ն ընկած ժանանակահատվածում ինքը ցանկացել է հանդիպել Շիրակի մարզպետ Հովսեփ Սիմոնյանին: Ինչպես հայտնում է ֆոտոլրագրող Գագիկ Շամշյանը, հանդիպման պատճառը եղել է այն, որ Գ. Շահբազյանը մարզպետի հրամանով ազատվել է թիվ 38 հիմնական դպորցի տնօրենի պաշտոնից: Նա մարզպետին հանդիպելու նպատակով դիմել է մարզպետի օգնական Արմեն Պետրոսյանին: Ըստ դիմումատուի՝ Ա. Պետրոսյանը խոստացել է, որ կդասավորի, որպեսզի ինքը հանդիպի մարզպետին, իսկ տնօրենի պաշտոնում վերականգնվելու դիմաց նա պահանջել է 6 մլն դրամ: Գ. Շամշյանի տեղեկություններով՝ 2016 թ.-ի նոյեմբերի 28-ին Շիրակի մարզպետ Հ. Սիմոնյանի համար 476 Ա որոշմամբ նշված հիմնական դպրոցի տնօրենի պաշտոնակատար է նշանակվել Գյումրի քաղաքի 42 ավագ դպրոցի փոխտնօրեն Արփինե Նիկողոսյանը: Դիմումատուն հայտնել է, որ այդ նշանակման համար Ա.Պետրոսյանին վճարել է 3 մլն դրամ՝մարզպետին փոխանցելու նպատակով, իսկ գումարի մյուս մասը՝ 3 մլն դրամը, նա ստանալու է տնօրենի թափուր տեղի համար նախատեսված մրցույթից հետո: Գ. Շամշյանի տեղեկություններով՝ փաստի առթիվ ոստիկանության Մուշի բաժնում հետաքննություն է սկսվել: SHAMSHYAN.com-ը պատրաստ է ներկայացնել հակառակ կողմերի տեսակետը նշված հարցի շուրջ: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: