«Հաց բերողի» կիսատ թողած աշխատանքներն ինձ մոտ են, թե ինչ է լինելու՝ չգիտեմ. ընկերը մանրամասներ է պատմում (տեսանյութ)

«Հաց բերող» Արթուր Սարգսյանի կիսատ թողած աշխատանքները նրա ընկերոջ՝ Արմեն Թովմասյանի մոտ են: Այս մասին Tert.am-ի հետ զրույցում ասաց  ընկերը՝ Արմեն Թովմասյանը: «Արթուր Սարգսյանին վերջին անգամ տեսել եմ ազատ արձակվելու հաջորդ օրը(մարտի 14-ին, խմբ) որ հիվանդանոցում էր և վերջին անգամ խոսել եմ երեկ: Իր շուրջ ծավալվող իրադարձությունների մասին առանձնապես չենք զրուցել, որովհետև առողջական վիճակը լավ չէր, նրանից հետո արդեն գործնական շփում էր մեր շփումը` կապված Վերնիսաժի գործերի հետ: Վերջին անգամ Վերնիսաժի հետ կապված գործեր էին, որոնք ես պետք է պատրաստեի, երեկոյան պետք է հանդիպեինք, որ տայի իրեն, բայց լավ չէր զգում, զանգահարեց և ասաց, որ լավ չէ»,-ասաց Թովմասյանը: Հարցին, թե Արթուր Սարգսյանը պատրաստվո՞ւմ էր վերադառնալ աշխատանքի, Արմեն Թովմասյանն ասաց, որ այո՛, ավելին, ջութակներ է պատրաստել, որպեսզի տար Արթուր Սարգսյանին: Արմեն Թովմասյանն ասաց, որ արդեն 22 տարի է ճանաչում է Արթուր Սարգսյանին, նա համառ բնավորություն է ունեցել: Հարցին, թե կա՞ն կիսատ աշխատանքներ, Արմեն Թովմասյանն ասաց, որ կան կիսատ աշխատանքներ, որոնք իր մոտ են.«Աշխատանքներն իմ մոտ են, բայց, թե ի՞նչ է լինելու՝ չգիտեմ»: Դիտարկմանը, թե մասնագիտությամբ քանդակագործ էր, ամենաշատն ի՞նչ էր քանդակում, Արմեն Թովմասյանն ասաց, որ ամենատարբեր իրեր, սկսած ժամացույցներից, մինչև եկեղեցիներ: «Արթուրն արտակարգ մարդ էր, լավ մասնագետ, նա երեխաներին պատրաստում էր ընդունելության քննությունների, նաև իմ երեխաների ուսուցիչն է, որի արդյունքում տղաս անվճար ընդունվեց համալսարան՝ նրա պարապած մաթեմատիկայով: Շատ լավ մարդ և մասնագետ էր»,-ասաց Արթուր Սարգսյանի ընկերը: Հիշեցնենք, որ Արթուր Սարգսյանը, ով մեղադրվում էր «Սասնա ծռերին» օժանդակելու մեջ, նախորդ տարվա դեկտեմբերի 31-ին ազատ էր արձակվել, սակայն քննչական մարմնից խուսափելու պատճառաբանությամբ բերման էր ենթարկվել և փետրվարի 9-ին կալանավորվել, իսկ փետրվարի 10-ին անժամկետ հացադուլ էր հայտարարել: Մարտի 13-ին «Հաց բերողի» խափանման միջոց կալանքը փոխվեց անձնական երաշխավորությամբ և նա «Դատապարտյալների հիվանդանոցից» տեղափոխվեց «Արմենիա» ԲԿ, իսկ մի քանի օր անց տեղափոխվել էր տուն՝ համապատասխան դեղորայքային նշանակումներով և հատուկ սննդակարգով: Արթուր Սարգսյանը 48 տարեկան էր: