Պահանջում են արդարադատության և առողջապահության նախարարների հրաժարականը

Արթուր Սարգսյանի՝ «Հաց բերողի» հիշատակին նվիրված բողոքի ցույցի մասնակիցները փորձեցին փակել Մաշտոցի պողոտան, սակայն ոստիկանները, շղթա կազմելով, քաշքշելով և հրելով՝ դուրս հանեցին նրանց: «Մի օր սաղիդ մորթելու են ձեր տան մեջ»,- բղավեց ակցիայի մասնակիցներից մեկը։ Ի վերջո, ցուցարարները տարբեր վանկարկումներով՝ «Ա՛ր-թո՛ւր», «Հա՛ց բե՛-րո՛ղ», «Հաց բե-րո-ղին սպա-նել են», պողոտայի մի կողմով շարժվեցին դեպի Արդարադատության նախարարություն։ «Սերժի ռեժիմին ծառայող յուրաքանչյուր կառույց համարվում է հանցավոր»,- հայտարարեց երթն առաջնորդող Շահեն Հարությունյանը: Երևանի փոխոստիկանապետ Վալերի Օսիպյանը հորդորեց չտանել բախման .<<Քննությունը կպարզի Արթուր Սարգսյանի մահվան հանգամանքները>>,ասաց նա:  Բանակցություններից հետո կրկին հրմշտոց սկսվեց ոստիկանների և ակցիայի մասնակիցների միջև։ Ակցիայի մասնակիցները փորձեցին դուրս գալ Խորենացի փողոց և հակառակ կողմից մոտենալ ՀՀ Արդարադատության նախարարության շենքին։ Օսիպյանը զգուշացրեց, որ Ոստիկանությունը կարող է օրենքով սահմանված միջոցներ կիրառել։ «Մենք Ոստիկանության դեմ ոչինչ չունենք, մեր բողոքը Սերժ Սարգսյանի և Արդարադատության նախարարության դեմ է»,- ասաց Շահեն Հարությունյանը:Նա կոչ արեց  ոստիկաններին՝ թույլ տալ իրենց մոտենալ ԱՆ շենք, կատարել իրենց հայտարարությունը և շարունակել երթը։ Օսիպյանը ցավակցություն հայտնեց տեղի ունեցածի կապակցությամբ, սակայն հավելեց, թե հիշատակն այդպես չեն հարգում, և կրկին զգուշացրեց, որ Ոստիկանությունը թույլ չի տա, որ այդ իրավիճակը երկար շարունակվի։ Քննարկումներից հետո որոշվեց վաղը ժամը 18։00-ին հավաքվել Ազատության հրապարակում՝ պահանջելով արդարադատության և առողջապահության նախարարների հրաժարականը. «Պահանջում ենք արդարադատության և առողջապահության նախարարների հրաժարականը»։