Ռուսաստանը կորցնում է Բաքուն
Թուրքիայի նախագահ Ռեջեփ Թաիփ Էրդողանը կտրուկ քննադատություն է հնչեցրել ԱՄՆ-ի հասցեին` հայտարարելով, որ Սիրիայի քրդերին աջակցելու ամերիկյան քաղաքականությունը պատճառ դարձավ, որ «արյան գետեր հոսեն»: Մոսկվայի հետ վիճած, իսկ այժմ Վաշինգտոնի հետ հակադրվող Էրդողանը հայացքն ուղղել է էթնիկապես Թուրքիային մոտ Ադրբեջանի ուղղությամբ: Բաքուն գնալով ներգրավվում է սիրիական հակամարտության մեջ և վաղ թե ուշ նա ստիպված կլինի ընտրություն կատարել Կրեմլի և Անկարայի միջև: Այս մասին գրում է «Գազետա.ռու»-ն: Պարբերականը հիշատակել է Սաուդիան Արաբիայի առաջարկը Ադրբեջանին «Իսլամական պետության» դեմ կոալիցիային միանալու մասին, ապա մեջբերել է Իլհամ Ալիևի այցը Լոնդոն, և ապա` Էրդողանի այցը Ադրբեջան` մեկնաբանելով, որ Բաքվի ներգրավումը Սիրիական հակամարտության հիմնական խաղացողների շարքում նշանակում է մեկ հարց` արդյոք Ռուսաստանը կորցնում է Ադրբեջանի վրա ազդեցությունը: Մեկնաբանելով մերձավոր Արևելքում ստեղծված աշխարհաքաղաքական իրադրությունը` պարբերականը գրում է, որ Ադրբեջանը բավականին զգուշավոր ու հավասարակշռող քաղաքականություն էր վարում սիրիական կոնֆլիկտում այս կամ այն կողմին միանալու ու աջակցելու առումով: Թուրք-ռուսական հարաբերությունների ճգնաժամային փուլում Ադրբեջանի համար վտանգավոր էր անդամակցելը Սաուդիան Արաբիայի նախաձեռնած հակաահաբեկչական կոալիցիային, որի անդամ է նաև Թուրքիան և որը հակադրվում է Ռուսաստանի ռազմավարական շահերին, մյուս կողմից Ադրբեջանը նաև չէր կարող միանալ ռուս-իրանական դաշինքին, քանի որ դրանից խիստ կտուժեին ռազմավարական հարաբերությունները Թուրքիայի հետ և բազմաթիվ հարցերի տեղիք կտաին: Սակայն երկար ժամանակ հավասարակշռություն պահելու այս հաջողված քաղաքականության վերջը, ըստ հոդվածագրի, եկել է, և առաջիկայում Ալիևը ստիպված է լինելու ոչ հեշտ ընտրություն կատարել քաղաքական կողմնորոշման առումով: Սաուդիան Արաբիան և Թուրքիան պատրաստվում են Սիրիա ցամաքային զորքեր մտցնել, ինչը ստացել է Պենտագոնի հավանությունը: Ըստ պարբերականի, եթե դա տեղի ունենա, ապա սիրիական կոնֆլիկտը լոկալ հակամարտությունից կվերածվի շահերի բաղման գլոբալ թատերաբեմի, որի մեջ կներքաշվեն նաև Հարավային Կովկասի և այլ տարածաշրջանների երկրները: Եվ ըստ ամենայնի` Լոնդոնում Ալիևի հետ քննարկվել է հենց այդ հարցը, թե որ թիմին է միանալու Բաքուն: Իսկ ընտրանքը Ադրբեջանի համար խիստ սահմանափակ է`կա´մ Ռուսաստան-Իրան թևը, կա´մ դրան հակադրվող ռազմավարական դաշնակից Թուրքիան`Արևմուտքի հետ միասին: Ըստ հոդվածագրի` Ադրբեջանի շահերից չի բխում այդ թիմերից որևէ մեկին անդամակցելը, ուստի Ալիևը կխուսափի դրանից որքան հնարավոր է, սակայն Արևմուտքը այդ հարցում կգնա շանտաժի`ստիպելով Ադրբեջանին որոշակիացնել իր դիրքորոշումը: Որպես շանտաժի միջոց, որը կկիրառի Արևմուտքը Ադրբեջանի դեմ, հոդվածագիրը նշում է Լեռնային Ղարաբաղի հիմնախնդիրը: Artsakhpress.am
Հետևեք մեզ Viber-ում
