«Աթեշյանի հրաժարականով ամեն բան կկարգավորվի».Մաշալյան
Հայկական «Ակոս» պարբերականի հետ զրույցում Պոլսո Հայոց պատրիարքարանի հոգևոր խորհրդի նախագահ Սահակ եպիսկոպոս Մաշալյանը նշել է,որ Ստամբուլի նահանգապետարանից եկած գրությունը անելանելի դրության մեջ է դրել հայկական եկեղեցին: Անհրաժեշտ է մոտ ժամանակներս հանդիպում կազմակերպել նահանգապետարանում: «Պատմական օր ապրեցինք: Մեր ավանդույթների, սովորույթների, կրոնական օրենքների համաձայն ժողով գումարեցինք և տեղապահ ընտրեցինք: Բոլորը կատարվածն ընդունեցին, ողջունեցին, սակայն դրանից հետո նահանգապետարանից եկած ուղերձը մեր ոգին տակնուվրա արեց: Չգիտեմ` ինչ ճանապարհով ենք ընթանալու, սակայն այստեղ մի թյուրըմբռնում կա: Նահանգապետարանից եկած նամակում կան կետեր, որոնք պարզաբանման կարիք ունեն: Մոտ ժամանակներս նահանգապետից հանդիպում կխնդրենք և պարզաբանումները նրանից կպահանջենք` մեր պարզաբանումներն էլ նրան ներկայացնելով: Սա պետության տեսանկյունից իրականում ուշադրության կենտրոնում պահելու, զգայուն մոտեցում ցուցաբերելու արժանի հարց է: Սա կրոնական հարց է: Աշխարհիկ պետության կողմից սահմաններն անցնելով կրոնական գործին միջամտելը բոլորիս հիասթափեցրեց»,-նշել է Մաշալյանը: Խոսելով նահանգապետարանից եկած նամակի մասին` սրբազանն ասել է. «Կամ նամակը նախապես էր եկել և սպասեցվել էր. եթե Արամ սրբազանը հաղթեր առհասարակ դուրս չհանվեր, կամ էլ գրվել էր որպես Արամ սրբազանի պարտության կապակցությամբ սեղանին դրվելիք նամակ: Այս ամենը չգիտենք: Սակայն հարցն այն է, որ այս նամակը կրկին մեր համայնքին, եկեղեցուն փոթորկի մեջ մտցրեց: Պետք սառնասրտություն դրսևորենք: Պետության հետ պայքարի մեջ մտնելն ամենավերջին բանն է, որ կցանկանայինք»: Մաշալյանը հույս է հայտնել, որ ի վերջո կհաղթանակի կրոնական և խղճի ազատությունը: Սրբազանն ընդգծել է նաև, որ եկեղեցական օրենքներով Արամ Աթեշյանն այլևս փոխանորդ չէ: «Աթեշյանի հրաժարականով ամեն բան կկարգավորվի: Հրաժարականի պարագայում կվերջանա նաև փոխանորդությունը: Արամ սրբազանին փոխանորդ ընտրած խորհուրդը նաև տեղապահ ընտրեց: Որքանով օրինական է նրա փոխանորդ ընտրվելը, նույնքանով էլ օրինական է Գարեգին սրբազանի տեղապահ ընտրվելը:
Հետևեք մեզ Viber-ում
