Զավեշտ. «Ադրբեջանի գիտության դերը Ամերիկայի հայտնագործության մեջ»
Զավեշտն այն աստիճանի է, որ դրա նկատմամբ իր հեգնանքը faktxeber.com-ի հետ զրույցում թաքցնել չի կարողացել Ադրբեջանի խորհրդարանի պատգամավոր Ֆազիլ Մուստաֆան:
«Հետո էլ ասում են, թե ինչու ես քննադատում կեղծ հայրենասերներին եւ պատմաբաններին: Սրան նայեք` «Ադրբեջանի գիտության դերը Ամերիկայի հայտնագործության մեջ»: Ես դեռ չեմ կարողանում որոշել, թե ինչում է կայանում 21-րդ դարում համաշխարհային գիտության սահմաններում Ադրբեջանի գիտության դերը, իսկ մարդիկ խոսում են 15-րդ դարում Ամերիկայի հայտնագործման մեջ Ադրբեջանի գիտության դերից», -ասել է նա: Ֆազիլ Մուստաֆան եւս զավեշտ է համարել միջնակարգ դպրոցի դասագրքում այդ թեզի ներկայությունը աշակերտների հայրենասիրական զգացմունքների մեծացման համար ներկայացվելու մասին պնդումները: «Վաղը մեկն էլ կվերցնի ու «Ամերիկայի հայտնագործության մեջ Ադրբեջանի գիտությունների ազգային ակադեմիայի պատմաբաններից բաղկացած արշավախմբի դերը» թեմայով գիտական թեզ կպաշտպանի», -հեգնել է նա: Ֆազիլ Մուստաֆայի խոսքով` ըստ ադրբեջանցի «գիտնականների»` Քրիստոֆոր Կոլումբոսը Ամերիկան հայտնագործել է իրենց կողմից «ադրբեջանցի» համարվող վաղ միջնադարյան գրող Նասրեդդին Թուսիի ստեղծագործությունների հիման վրա: «Էդ ո՞ր խելքը գլխին գիտնականը կարող է Նասրեդդին Թուսիի ժառանգությունն անվանել Ադրբեջանի գիտություն: Որեւէ մեկը 13-րդ դարի որեւէ աղբյուրում Ադրբեջանի մասին գրառում հանդիպել՞ է: Կամ Կոլումբոսը երբ՞ եւ որտեղ՞ է ասել, թե օգտվել է Թուսիի ժառանգությունից», -նշել է նա: Ֆազիլ Մուստաֆան Ադրբեջանի ԳԱԱ «գիտական» մակարդակի վերաբերյալ եւս մի ծիծաղելի օրինակ է բերել: «Մի անգամ մի հարգարժան գիտնական ինձ ասաց, որ իր գիտական թեզի թեման է «Նախնադարյան հասարակության մեջ զբոսաշրջությունը»: Ես չկարողացա թաքցնել ծիծաղս: Մի՞թե նախնադարյան հասարակության մեջ որեւէ մեկը կարող էր մտածել զբոսաշրջության մասին: Նավթադոլարների ցայտման ժամանակներում Բաքվում «Տնտեսության Ադրբեջանի մոդելը» թեմայով համաժողով էին կազմակերպել: Այժմ այդ թեման մոռացել են, որովհետեւ հասկացել են դրա աբսուրդ լինելը: Ուզում եմ մեր գիտնականներին խորհուրդ տալ, որ իրենց գիտական թեզերի համար համոզիչ անուններ ընտրեն, որպեսզի նրանց նկատմամբ հարգանքը արժեզրկված ադրբեջանական մանաթի չափ չիջնի», -ասել է նա:
Հետևեք մեզ Viber-ում
