Բժիշկի մեղքով Հրազդանում 11–ամյա աղջնակ է մահացել/տեսաշար/

Այս տարվա փետրվարի 7-ին Կոտայքի մարզի Հրազդան քաղաքի բժշկական կենտրոնից «Արաբկիր» ԲԿ տեղափոխված և այնտեղ մահացած 11-ամյա Գեղեցիկ Սոնջյանի ընտանիքի անդամները չեն կարողանում համակերպվել այն դաժան մտքի հետ, որ բժշկուհու սխալ բուժման պատճառով իրենց երեխան մահացել է: SHAMSHYAN.com-ի թղթակցի հետ զրույցում երեխայի տատիկը և մայրիկը, մասնավորապես, ասում էին. «Հունվարի 11-ին երեխան իրեն լավ չէր զգում և տարանք պոլիկլինիկա, անալիզներ հանձնեցինք և ասացին, որ ամեն ինչ նորմալ է. անհանգստանալու ոչինչ չկա: Սակայն մենք հետագա մի քանի օրերին նկատեցինք, որ երեխան իրեն լավ չի զգում. ընդհանուր թուլություն ուներ և դժվարությամբ էր քայլում ու զանգեցինք տեղամասի բժշկուհուն, խնդրեցինք` գա տուն, էրեխուն նայի: Նա ուրիշ դեղեր նշանակեց և ասաց, որ երկուշաբթի՝ հունվարի 25-ին,` կբերեք բժշկի: Արդեն երկուշաբթի գնացինք, կրկին մի քանի անալիզներ հանձնեցինք և մեզ ասացին` գնանք հիվանդանոց, որտեղ բժիշկ-մանկաբույժ Մարինե Հակոբյանը խորհուրդ տվեց, որ երեխան մի քանի օր կաթիլայիններ ստանա ու ամեն բան լավ կլինի: Հենց այդ կաթիլայիններն էլ պատճառ դարձան, որ մենք արդեն «Արաբկիր» բժշկական կենտրոնում կորցնենք մեր երեխային»: Երեխայի մայրն ասաց, որ մահվանից հետո սպասել են պատասխաններին՝ դիահերձարանից, որ իմանան` ինչից է մահացել իրենց երեխան, միգուցե ինչ-որ թաքնված հիվանդություն է ունեցել, սակայն պարզվել է, որ դա ամենևին էլ այդպես չէ: Միայն երեխայի թաղման օրն են հավաքված սգավորները ասել, որ բժիշկ-մանկաբույժ Մարինե Հակոբյանը առաջին անգամ չի երեխայի կյանք խլում և նրա անբարեխիղճ վերաբերմունք դրսևորելու և իր պարտականությունները չկատարելու պատճառով 2015 թվականի փետրվարի 4-ին մահացել էր 40 օրական Մանե Հարությունյանը, ինչի համար բժիշկ-մանկաբույժը դատապարտվել էր 2 տարի ազատազրկման: Վերջում ընտանիքի անդամները հույս հայտնեցին, որ նման բժիշկները կհեռացվեն հիվանդանոցներից և իրենց նման տառապող ընտանիքներ այլևս չեն լինի: Լուսանկարները և տեսանյութը՝ Սմբատ Պետրոսյանի