«Երանոսյանի փեսան ու եղբայրը հարձակվել են ակտիվիստների վրա»․ մանրամասներ Ջրառատի դեպքից

Արմավիրի մարզի Ջրառատ գյուղում երեկ կայացած «Օհանյան-Րաֆֆի-Օսկանյան» դաշինքի նախընտրական  հանդիպումից հետո, ըստ դաշինքի հաղորդագրության՝ գյուղապետ Սամվել Գալստյանի կողմից սպառնալիքներ են հնչեցվել դաշինքի համակիրների հանդեպ, անգամ վերջինիս ուղղությամբ ատրճանակ է ուղղվել գյուղապետի մերձավորների կողմից, ինչից հետո էջմիածնի բաժին են բերման ենթարկվել դաշինքի համակիրները։ Դաշինքի համակիր Ազատ Արշակյանը Hayeli.am-ի հետ զրույցում պատմեց, որ Ջրառատում իրենց շատ ջերմ են ընդունել․ «Երեխաները պարեցին, երգեցին, աղուհացով դիմավորեցին, մենք էլ ոգեւորված էինք, գյուղացիներն ասացին, որ ունեւոր բնակիչները սուսուփուս գնում են տարբեր ուղղություններով, հավաքին չեն մասնակցում։ Հետո գյուղացիներից մեկն ասաց, որ մարզպետը բոլորին կանչել է ինչ-որ տեղ ու ասացին որ Երանոսյանի (փոխոստիկանապետ Լեւոն Երանոսյան) եղբայրը կանգնած հսկում է, դե էդ տղերքն էլ  բիզնեսներ ունեին, չէին կարող մնալ»,-պատմեց Արշակյանը։ Ազատ Արշակյանի խոսքով՝ արդեն Եղվարդում են եղել, երբ տեղեկացել է Ջրառատի «ներկա-բացակայի մասին»: «Որ էնտեղ ռազբորկեք են արել, ակտիվիստներից մի քանիսի վրա Երանոսյանի փեսան ու եղբայրը հարձակվել են, Սեյրան Օհանյանն ու Արմեն Մարտիրոսյանը կիսատ թողեցին մեր արշավը ու հետ գնացին Ջրառատ»,-ասաց նա՝ հավելելով, որ այդ դեպքից հետո իրենք չեղարկել են Զովունիի նախընտրական հանդիպումը։ Այժմ ՕՐՕ դաշինքը նախընտրական հանդիպումներ  է իրականացնում Սյունիքի մարզում։ Ազատ Արշակյանն ասաց, որ բոլոր մարզերում էլ իրենց են մոտենում բնակիչներից ու հայտնում, որ իրենց սպառնում, խնդրում ու համոզում են չգնալ հանդիպումներին․ «Բոլոր տեղերում հանրապետական պարտիական  բջիջները ակտիվորեն խափանում են մեր հանդիպումները, բայց պետք է ասեմ, որ հանդիպումները հաջող են, հետաքրքիր են անցնում, մարդաշատ են, այնպես որ հաղթելու ենք»,-եզրափակեց նա։ Ջրառատի գյուղապետի հետ կապ հաստատել չհաջողվեց, նրա հեռախոսին պատասխանեց մեկ ուրիշը՝ ասելով, որ վերջինս զբաղված է։ Ի դեպ, ըստ Ազատ Արշակյանի՝ բերման ենթարկված երիտասարդներն ազատ են արձակվել, ոստիկանությունից այս տեղեկությունը ոչ հերքեցին, ոչ հաստատեցին՝ ասելով, որ գործը Քննչական կոմիտեի վարույթում է։ Քննչական կոմիտեից տեղեկացանք, որ գործն իրենց վարույթում է. «Դատավարական գործողություններ են իրականացվում դեպքի իրական հանգամանքները պարզելու ուղղությամբ»,-ասացին Քննչական կոմիտեից՝ հավելելով, որ բերման ենթարկված անձինք ազատ են արձակվել: Սեդա Ղուկասյան