Ժողովուրդը պետք է գիտակցի, որ ինքն ապրանք չի. Սասուն Միքայելյան
Ժողովուրդը պետք է գիտակցի, որ ինքն ապրանք չի: Այս մասին, Հայելի ակումբում լրագրողների հետ հանդիպման ժամանակ նշել է «Ելք» դաշինքի ցուցակի 5-րդ հորիզոնականը զբաղեցնող Սասուն Միքայելյանը: Ինչպես շեշտել է՝ ինքը 4 անգամ պատգամավոր է ընտրվել մեծամասնական ընտրակարգով. «Ես ուրիշին թալանելով ու գռփելով չեմ ճանաչելի դարձել, այլ իմ ծառայություններով, 4 անգամ ընտրվել եմ մեծամասնական համակարգով: Եղել եմ Հրազդանի առաջին քաղաքապետը»: Այնուհետև ողջունեց այն ուժերի գործողությունները, որոնք փորձում են ինչ-որ բան փոխել՝ երկիրը դեպի լավը տանելու համար: «Այն ուժերը, որ եղել են իշխանության մաս, կամ այն ուժերը, որ նոր են մտել քաղաքական դաշտ եւ ըմբոստացել են իշխանության դեմ, ուզում են ինչ –որ բան փոխել՝ ես ողջունում եմ այդ անձանց եւ ուժերին, որովհետեւ երկրում հիմա ծանր վիճակ է: Ոչ մի կուսակցություն չի կարող մենակ իշխանափոխություն անի, համակարգային փոփոխություն անի, ուժ է պետք, որ իշխանությունը հասկանա, որ իր զինանոցը դատարկ է, որ իրեն սպառել է, ինքը պետք է գնա, պետք է զիջի, ոչ մի իշխանություն հավերժ չի»,- ասել է նա:
Հետևեք մեզ Viber-ում
