Նովոն անվճար տարածքի «կարիք չունի», բայց չի հրաժարվել
«Փաստ» օրաթերթը գրում է. «Մամուլը գրել է, որ Արմավիրի մարզի Սարդարապատ համայնքի ավագանին որոշել է Հանրապետական կուսակցությանը եւ ՀՀԿ–ական պատգամավոր, պատգամավորության թեկնածու Նահապետ Գեւորգյանին (Նովո) համայնքային սեփականություն հանդիսացող շինությունից նախընտրական շտաբի համար անհատույց տարածք հատկացնել: Ըստ այդմ՝ Սարդարապատի Աբովյան 72 հասցեում գտնվող համայնքային շինությունից 40 քմ տարածք անհատույց հատկացվել է ՀՀԿ–ին, իսկ Նահապետ Գեւորգյանին՝ 20 քմ: «Լավ են արել, ճիշտ են արել, ի՞նչ կա: Ոչ թե մենակ իմ համար ա ավագանին որոշում կայացրել, այլ որ թեկնածուն որ ցանկություն ունենա, կտրամադրեն անվճար»,– «Փաստի» հետ զրույցում հայտարարեց Նահապետ Գեւորգյանը: Հետաքրքրվեցինք, թե արդյոք Նահապետ Գեւորգյանն անվճար տարածքի կարիքն ուներ: «Ես անկեղծ ասած դրա կարիքը չունեի, բայց քանի որ ավագանին նման որոշում ա կայացրել... մնացածներն էլ թող դիմեն, որոշումը կստանան»,– ասաց Գեւորգյանը: Դիտարկմանը, թե այդպիսով անհավասար պայմաններ են ստեղծվել իր ու մյուս թեկնածուների միջեւ, Նահապետ Գեւորգյանը չպատասխանեց. «Ցտեսություն ձեզ»: Առավել մանրամասն՝ թերթի այսօրվա համարում:
Հետևեք մեզ Viber-ում
