Կխնդրեիք, որ Առաքել Մովսիսյանը, Սամվել Ալեքսանյանը գային ձեր ռեյտինգային ցուցակ. Արագած Ախոյանը՝ Արայիկ Հարությունյանին

«Ելք» դաշինքից թիվ 3 ընտրատարածքում առաջադրված Արայիկ Հարությունյանն այսօր Հայելի ակումբում լրագրողների հետ հանդիպմանն ասաց, որ քարոզարշավի ընթացքում առկա խնդիրները հիմնականում լուսաբանվում են լրատվական հաղորդումներում, որտեղ փորձ է արվում պահպանել հավասարակշռությունը, մինչդեռ բանավեճերի համար եթերները փակ են:Նա նշեց, որ ամենալավ սահմանադրության դեպքում էլ ՀՀԿ-ն ընտրությունները կանցկացնի խախտումներով: Հանրապետական կուսակցությունը քաղաքական կամք չունի իր ռեյտինգային ցուցակով չառաջադրելու այն անձանց, որոնք ճնշումներ են իրականացնում, ցուցակներ կազմելով եւ շուտով ընտրակաշառք կբաժանեն: Հանրապետական ցուցակով թիվ 7 ընտրատարածքում առաջադրված Արագած Ախոյանը թույլ ելույթ համարեց նրա ասածները. «Թուլություն է ի սկզբանե մեղադրել իշխող կուսակցությանը: Փաստերով խոսե՛ք: Եթե ի սկզբանե խոսում եք ինչեր կանեն, կլինի, ուրեմն՝ անիմաստ է: Եթե խոսում եք ընտրակաշառքից, ուրեմն՝ հայտարարում եմ՝ ընտրակաշառքը հորինել է ընդդիմությունը: Այնպիսի թվերից են խոսում եւ գցել են այս խեղճ ժողովրդի, կոպիտ ասած, ջանին, որ անհնար է: Ասում են՝ ճի՞շտ է, որ 30, 40, 100 մինչեւ 500 դոլար փող եք տալիս, ասում եմ՝ հա՛, ընդդիմությունը տալիս է: Ընդդիմության քայլերի վերաբերյալ կարելի է լավ երգիծական գիրք գրել նախընտրական քարոզարշավի մասին, էսքան խոստումներ, սեփական տեսակետը իրականության տեղ են առաջադրում»: Արայիկ Հարությունյանն էլ ասաց. «Երգիծական գիրք գրեք ձեր պատգամավորների՝ Առաքել Մովսիսյանի, Սամվել Ալեքսանյանի եւ մնացածի մասին»: Սակայն Արագած Ախոյանը ընդհատեց նրան. «Անուններ մի՛ տվեք: Կարծում եմ՝ մեկը հենց դուք կխնդրեիք, որ գային ձեր ռեյտինգային ցուցակ»: