Ինչո՞ւ մինչև ինձ դրանք չեն վերացել. Սեյրան Օհանյանն իր ղեկավարած տարիների մասին
Երևանի վետերանների միությունում կազմակերպված ՕՐՕ դաշինքի քարոզարշավի ժամանակ պաշտպանության նախկին նախարար Սեյրան Օհանյանը նշել է, որ իր ղեկավարման տարիներից են սկսել Հայաստանում պետական մակարդակով զորավարժություններ անցկացվել. «Իմ ղեկավարման տարիներին է, որ զորահավաքային ուղղությամբ հավաքներ ենք անցկացրել պետական կառավարման և ՏԻՄ մարմինների հետ: Վերջին զորավարժությունը «Շանթ-2015» զորավարժությունն էր: Իմ ղեկավարման տարիներին է, որ բանակ-հասարակություն կապը սկսել է ամրապնդվել, և բանակը մաքսիմալ բացվել է ժողովրդի առջև՝ հաշվի առնելով այն հանգամանքը, որ այնտեղ, որտեղ բանակն ու ժողովուրդը միասնական են, նրանք անպարտելի են»: Ինչպես ասել է՝ իր ղեկավարման տարիներին բավական լուրջ աշխատանք է տարվել՝ կոռուպցիոն ռիսկերի դեմ պայքարի առումով. «Կադրային քաղաքականության մեջ սուբյեկտիվ գործոնները վերացել են: Ինչո՞ւ մինչև ինձ դրանք չեն վերացել: Մենք լուրջ հաջողություններ ենք ունեցել մարդկային ռեսուրսների կառավարման ոլորտում, զորակոչի մեջ արդարության մեծ մակարդակ ենք վերցրել ու հասել դրան: Զորակոչն իրականացվել է վերահսկողությամբ, իր մեջ միշտ պարունակել է կոռուպցիոն ռիսկեր, և շատ մարդիկ այդ ոլորտում մեծ հարստություններ են դիզել. ես կանգնեցրել եմ այդ ամենը, ինչո՞ւ մինչև ինձ չի արվել»:
Հետևեք մեզ Viber-ում
