Արգամ Աբրահամյանի թիմակցի դեմ քրեական գործ է հարուցվել. գիշերը նրան տնից բերման են ենթարկել

Այս գիշեր Արարատի բաժնի ոստիկանները խուզարկություն են կատարել Արևշատ գյուղի բնակիչ Գեղամ Հակոբյանի բնակարանում, ապա բերման ենթարկել նրան: Հակոբյանն Արտաշատի քաղաքապետ Արգամ Աբրահամյանի թիմակիցներից է: Ոստիկանության լրատվության վարչությունից հայտնեցին, որ խուզարկությունը կատարվել է քրեական գործի շրջանակներում: Իսկ թե կոնկրետ ի՞նչ քրեական գործ է և ե՞րբ է այն հարուցվել, խնդրեցին ճշտել նախաքննական մարմնից: NewsBook-ը փորձել է Քննչական կոմիտեի լրատվականից պարզել` ո՞ր հոդվածով է հարուցվել գործը և ե՞րբ: Վերջիններս խոստացան օրվա ընթացքում գործի վերաբերյալ մանրամասներ հաղորդել: Նշենք, որ օրեր առաջ Արգամ Աբրահամյանի շտաբի մեկ այլ անդամ` Գարսևան Վարդանյանը, Գոռ և Տիգրան Բաղդասարյանները կանչվել էին ոստիկանության Արտաշատի բաժին: Նույն բաժնի ՃՈ աշխատակիցները մարտի 3-ին տուգանային հրապարակ էին տարել Աբրահամյանի հարազատներից մեկի` Խաչիկ Հովհաննիսյանի մեքենան: Ոստիկանության լրատվության վարչությունից պարզաբանել էին, որ Հովհաննիսյանի մեքենան տուգանային հրապարակ են տեղափոխել չթույլատրված ձայնային ազդանշանային համակարգ կիրառելու համար: Սակայն մեր տեղեկություններով` ավտոմեքենայի տիրոջը ևս բերման էին ենթարկել Ճանապարհային ոստիկանություն: ՃՈ աշխատակիցները հայտարարել էին, թե օրեր առաջ «Արտաշատի միլպետի մեքենայի առաջն ես կտրել, հիմա պետք է պատասխան տաս»: Newsbook.am