Վերջացած գեներալի անտակտությունը

Ապրիլյան քառօրյայում զոհվածների մայրերը հենց քառօրյայի ընթացքում բացահայտված օֆշորային սկանդալի հերոս, այլեւս որպես վերջացած գեներալ Միհրան Պողոսյանի կողքին են։ «Միհրանը միշտ կանգնած է եղել իմ ընտանիքի կողքին»,- ասում է զոհվածներից մեկի՝ Բագրատ Ալեքսանյանի մայրը։ 21-ամյա Բագրատ Ալեքսանյանը զոհվել է 2016 թվականի ապրիլի 2-ին՝ Ջաբրայիլի դիրքերում ռազմական գործողությունների ժամանակ։ Բագրատ Ալեքսանյանը հետմահու պարգևատրվել է «Մարտական ծառայության» և «Արիության» շքանշաններով։ Ջաբրայիլի դիրքերը պաշտպանող 18 զինծառայողի մահվան հանգամանքները պարզված չեն։ Ըստ Հելսինկյան քաղաքացիական ասամբլեայի Վանաձորի գրասենյակի զեկույցի` Ջաբրայիլում տանկերը եղել են անսարք, զինծառայողները բավարար քանակով ռազմամթերք չեն ունեցել։ Հանկարծակի եկած զինծառայողները երկար ժամանակ մարտի են բռնվել հակառակորդի հետ: Զուգահեռ կապ են հաստատել հրամանատարական շտաբի հետ՝ խնդրելով աջակցել և հայտնել հետագա գործողությունների մասին։ Որևէ պատասխան կամ հրահանգ չեն ստացել: Ապրիլի 2-ին, ժամը 07:30-ից կապը կորել է: Առողջ, բանական տրամաբանությունը թույլ չի տալիս հասկանալու՝ ինչու, ինչն է հերոսի մորը տիկին Նարինեն այսքան մոտեցրել այն գազանին, որը սպանեց իր զավակին...Օֆշորային ու թալանչի գեներալների , երկրի տնտեսությունն արնաքամության հասցրած իշխանության պահած բանակի խեղճուկրակ դեմքը չէ՞ որ երեւաց հենց ապրիլյան պատերազմի օրերին ։ Պարզվեց, որ իշխանության հորջորջած տարածաշրջանի ամենամարտունակ բանակը հակառակորդի դեմ կռվել է 80-ականների կիսավեր զենքով, ավելի ճիշտ՝ հայ զինվորը նորագույն զինտեխնիկայի դեմ դուրս էր հանել ոգին,կորովը։ Չէ՞ որ ապրիլյան քառօրյային զոհ գնացածները նաեւ այս իշխանության ագահության, աչքածակության, թալանի ու կողոպուտի զոհերն են։ Իսկ առավել եղկելին այս պրծած գեներալի անբարոյական մտահաղացումն է։ Զոհված Բագրատ Ալեքսանյանի մայրը քարոզարշավային հարթակից ելույթ է ունենում և գովում է Միհրան Պողոսյանին, մի քանի անգամ շնորհակալություն է հայտնում թեկնածուին, որն իր ընտանիքին օգնել է: Բեմում իր հասցեին «մեծարանքի ու շնորհակալության խոսքեր» լսող Պողոսյանն էլ այնպիսի խրոխտ կեցվածք է ընդունում, ասես առնվազն ինքն էր մի քանի անգամ զոհվել պատերազմում , ինքն էր անդառնալի կորուստ ունեցել ։ Ամիսներ առաջ ՀՀԿ Կանանց խորհրդի համաժողովում արդեն տեսել ենք, թե ինչպես էին քառօրյա պատերազմի զոհերի մայրերին ներգրավվել ՀՀԿ տիկնանց շարքերում: Սա քիչ համարելով՝ հիմա էլ նրանց ներգրավվում են իրենց քարոզարշավում: Մի օգտագործեք զոհված մայրերի վիշտը, մի նվաստացրեք նրանց, մի ցուցադրեք ձեր արած աջակցությունը, սա ուղղակի ստորություն է։ Մի՞թե մանդատ կողոպտելու համար պատրաստ եք ամեն ինչի, մինչեւ անգամ սգավորների վիշտն անարգելու։ Անի Սահակյան