Պատգամավորներ կան 25 բառ չեն խոսել. ՀՎԿ-ի քարոզարշավը Մասիսում. լուսանկարներ

Մասիս քաղաքի երաժշտական տանը մեկնարկել են Հայկական վերածնունդ կուսակցության (նախկին ՕԵԿ)ի նախընտրական հանդիպումները։ Տեղեկացնենք, որ մինչ հանդիպումը երաժշտական տուն եկող մարդիկ հիմնականում խումբ-խումբ էին գալիս քայլելով կամ մեքենայով եւ հրաժարվում էին լրագրողների հետ խոսել։ Կուսակցության նախագահ Արթուր Բաղդասարյանին ներկաները հոտնկայս դիմավորեցին: Նախ ելույթ ունեցան Մասիսում առաջադրված թեկնածուները, ապա Բաղդասարյանը, որը հայտարարեց, որ ոչ թե թաղի տղերք ընտրություն է, այլ բարձրադիր իշխանությունների. <Պատգամավորներ ունենք` տարի է խորհրդարանում են, բայց 25 բառ չեն խոսել, գնալով մեր երկրի վիճակը վատանում է, գնալով չքավորությունը զարգանում է, պետք է կանգ առնենք, փոփոխություն է պետք, ու մենք պետք է դառնանք այդ փոփոխության ջատագովը>: Բաղդասարյանը խոսեց նաեւ ընտրակաշառքների մասին` ասելով, որ առաջին անհրաժեշտության ապրանքները թանկացել են, որպեսզի կարողանան մարդկանց քվեն առնել, սակայն վերջում եզրակացրեց, որ գոնե փողը վերցնելուց հետո մարդիկ ճիշտ ընտրություն կատարեն։ Բաղդասարյանը ներկայացրեց կուսակցության նախընտրական ծրագիրը. <Հայաստանում եթե փող չունես, դատապարտված ես մեռնելու, մենք մերժում ենք դա, մարդը չպիտի մեռնի, որովհետեւ փող չունի>։ Ելույթն ավարտելուց հետո Բաղդասարյանը կոչ արեց ջիգյարով ծափահարել եւ հետնամուտքով արագ հեռացավ։ Սեդա Ղուկասյան