Ապրիլյան պատերազմի մասնակիցը մանրամասնում է, թե ինչու է միացել ՕՐՕ դաշինքին

Կոտայքի մարզկենտրոն Հրազդան քաղաքում այսօր մեկնարկեցին ՕՐՕ դաշինիքի նախընտրական հանդիպումները։ Տեղեկացնենք, որ շարժման ղեկավարներից ներկա են Սեյրան Օհանյանը եւ Վարդան Օսկանյանը, Րաֆիի Հովհաննիսյանը, ինչպես տեղեկացանք դեռ չի վերադարձել ԱՄՆ-ից։ Ներկա է նաեւ Ժառանգություն կուսակցության փոխնախագահ Արմեն Մարտիրոսյանը, ինչպես նաեւ Կոտայքի մարզում ռեյտինգային ընտրակարգով առաջադրված թեկնածուները։ ՕՐՕ դաշինքին է միացել նաեւ ապրիլյան քառօրյա պատերազմի մասնակից Մանուել Մանուկյանը։ Hayeli.am-ի հետ զրույցում Մանուելը պատմեց, որ ծառայել է Հադրութի դիրքերից մեկում, դիրքի ավագն է  եղել, ծառայությունն ավարտելուց ծրագիր է ներկայացրել նախարրա Սեյրան Օհանյան՝ դիրքի ավագների պարտադիր կրթության եւ սերժանտական խորհրդի զարգացման վերաբերյալ․ «Պարոն Օհանյանն իր ողջ վարչակազմով ընդունել է ինձ, իրեն ոչ ծանոթ եմ եղել, ոչ բարեկամ, Արմավիրի մարզի Շենիկ գյուղից եմ, ծրագիրը ներկայացնելուց հետո տեսել եմ պարոն Օհանյանի անդրադարձը։ Այդ ծրագիրն է ինձ մոտ վստահություն առաջացրել, համոզված եմ նաեւ, որ խնդիր լինելու դեպքում պարոն Օհանյանը զենք կվերցնի ու կլինի մեր կողքին»,-ասաց նա։ Մեր զրուցակիցը պատմեց, որ սեփական աչքերով է տեսել, թե Օհանյանն ինչ վերաբերմունք է ցուցաբերել զինվորների նկատմամբ։ Ինչ վերաբերում է նրան, որ շատ զինծառայողների զինգրքույկում բացակայում է այն, որ մասնակցել են քառօրյային, Մանուելն ասաց, որ նման շատ ծանոթներ ունի․ «Այդ պատճառով թողել են երկիրը, գնացել ուրիշ երկրներում աշխատում են, պետության կողմից ուշադրության չեն արժանացել, դա արվել է ուսման վարձի զեղչ չանելու համար, դրա համար պատմությունը հերքեցին, դա սրբապղծություն է, չի կարելի այդպես վարվել այն տղաների հետ, որոնց համար աղոթում էին, եւ որոնք իրենց կյանքի գնով պայքարեցին մեր երկրի համար»,-ասաց նա՝ կոչ անելով իր մարտական ընկերներին միանալ ՕՐՕ դաշինքին։ Մեր հարցին՝ ապրիլյան պատերազմի ժամանակ կորցրած տարածքների համար Սեյրան Օհանյանին մեղավոր չի՞ համարում, մեր զրուցակիցն ասաց․ «Եթե ինչ-որ խնդիր կա պատերազմում, մեղավոր եմ համարում բոլոիս՝ ինձ, ձեզ եւ յուրաքանչյուր մարդու, որովհետեւ չի կարող ողջ բանակը լինել ինչ-որ մեկի ձեռքում, յուրաքանչյուր մարդ պետք է գիտակցի, որ ինքը անելիք ունի բանակի համար։ Բանակը կարիք ունի ձեզ նման աղջիկների, տղաների, ես զինվոր եմ եղել, եւ զգացել եմ այդ կարիքը»,-ասաց նա՝ հավելելով, որ զինծառայողը նաեւ ապահովություն է ստանում թիկունքից։ Սեդա Ղուկասյան