Թուրքիան հատել է կարմիր գիծը. Շուլց
Գերմանական Deutsche Welle պարբերականը հայտնում է,որ Գերմանիայի Սոցիալ-դեմոկրատական կուսակցությունից կանցլերի թեկնածու Մարտին Շուլցը հայտարարել է, որ Թուրքիան գերմանական կառավարության քայլերը նացիստական գործելաոճին նմանեցնելով հատել է կարմիր գիծը: «Նախագահ Ռեջեփ Թայիփ Էրդողանը պետք է շատ լավ իմանա հետևյալը. բարեկամ երկրի նախագահն այստեղ գոհունակությամբ կընդունվի: Սակայն թույլ չենք տալու, որ Թուրքիայի քաղաքական բախումները տեղափոխվեն Գերմանիա: Էրդողանը ստիպված է ենթարկվել օրենքներին, և այդ մասին կանցլեր Մերկելը պետք է հայտնի նրան »,- հայտարարել է Շուլցը: Գերմանիայի Համբուրգ քաղաքի Plaza Event Center սրահում նախատեսված Թուրքիայի արտաքին գործերի նախարար Մևլութ Չավուշօղլուի միջոցառումը, որը տեղի էր ունենալու սահմանադրական հանրաքվեի քարոզարշավի շրջանակում, չեղյալ էր համարվել: Արտգործնախարարը ստիպված էր եղել ելույթ ունենալ Թուրքիայի հյուպատոսի կեցավայրում:
Հետևեք մեզ Viber-ում
