«Ելք»-ը բացառում է ՀՀԿ-ի հետ կոալիցիան
Ըստ «Լուսավոր Հայաստան» կուսակցության նախագահ Էդմոն Մարուքյանի՝ իրենք ստանում են ընտրակաշառքի բաժանման մասին բազմաթիվ ահազանգեր: «Անընդհատ ահազանգեր ենք ստանում գրասենյակ, որ ցուցակագրում են, որ փող բաժանեն: Էս պահին մենակ Հանրապետականի մասին է խոսքը: Բայց մենք փաստ չունենք, որպեսզի դա իրավական ընթացակարգով վերջացնենք: Որովհետև երբ մենք ասում ենք՝ կգաք դրա մասին հայտարարեք, մարդիկ ասում են՝ «մենք գործ չունենք»: Ինչու, որովհետև չեն վստահում իրավապահ մարմիններին», - «Առավոտ»-ի փոխանցմամբ՝ ասել է Մարուքյանը: Ըստ թերթի, վերջինս նաև ասել է, որ «Ելք»-ը չի պատրաստվում որևէ պարագայում Հանրապետական կուսակցության հետ կոալիցիա կազմել. ««Ելք» դաշինքը այսօր եղած միակ ընդդիմադիր բևեռն է, որ մարտահրավեր է նետում իշխանություններին: Մենակ «Ելք» դաշինքի իմ պաստառներն են, որ քաղաքում պատռվել են, որևէ այլ պաստառ չի պատռվել, ինչո՞ւ: Ուժեր կան, որ մասնակցում են ընտրություններին, որ ձայն տանեն որպես «ընդդիմություն», հետո գնան միանան Հանրապետական կուսակցությանը: «Ելք» դաշինքն ի սկզբանե հայտարարել է, որ մենք բացառում ենք Հանրապետական կուսակցության հետ կոալիցիայի ձևավորումը: Դե թող մյուս ուժերն էլ հայտարարեն, բա ինչի՞ չեն հայտարարում»:
Հետևեք մեզ Viber-ում
