«Ես Վազգենը չեմ». Արամ Սարգսյան

Ելք դաշինքը գաղափարական դաշինք է`մտածված ու բալանսավորված ծրագրով: Այս մասին hayeli.am-ի հետ զրույցում ասաց Ելք դաշինքի անդամ, Հանրապետություն կուսակցության նախագահ Արամ Սարգսյանը: «Եթե հանրությունը մեր մոտեցումները կիսի, քվեարկելու է մեր օգտին, եթե կիսի ՀՅԴ-ինը կամ Ազատ դեմոկրատներինը, կքվեարկի իրենց»,-ասաց նա: Ըստ Արամ Սարգսյանի` իրենք չեն քարոզում, որ իրենք լավագույնն են, եւ մարդիկ պետք է իրենց օգտին քվեարկեն։ «Ամենածիծաղելի վիճակն է, երբ ուզում են բոլորի համար լավ լինել, մենք էսպիսին չենք»,-նշեց նա։ Մեր հարցին, թե ինչու խուսափեց առաջադրվել հայրենի Արարատի մարզում, միգուցե խուսափել է մարզի սկանդալային դեմքերից, Սարգսյանն ասաց. «Բացարձակ ոչ, Արարատի մարզում առաջադրված է Ռազմիկ Թեւոնյանը, մանկության տարիների իմ ընկերը, անցած ընտրություններին ինքն է առաջադրվել եւ այդ տարածքում 12.000 քվե է ունեցել։ Փորձված թեկնածու է, ուստի այնտեղ առաջադրվելս լրացուցիչ ճոխություն էր լինելու էն դեպքում, երբ Սյունիքում խնդիրներ կան եւ այնտեղից էլ պետք էր ձայներ բերել»։ Ինչ վերաբերում է մեր այն հարցին, թե արդյոք քարոզարշավի ժամանակ դերակատարություն ունենո՞ւմ է այն հանգամանքը, որ ինքը Վազգեն Սարգսյանի եղբայրն է, Արամ Սարգսյանը պատասխանեց. «Ես երբեք չեմ օգտվել եղբորս թողած ժառանգությունից, ասել եմ, որ ես Վազգենը չեմ, չեմ անցել իր անցած ճանապարհը, ինձ ընդունեք էնպիսին, ինչպիսին կամ»: Սեդա Ղուկասյան