Քանի արջը կա…

Ինչպես հայտնի է պատմականորեն Ռուսաստանը համեմատել են արջի հետ, սա պատահական համամետություն չէ: Արջը մենակյաց, ինքնուրույն գործող կենդանի է: Արջի հզորությունը նրա մենակությունն է, կենդանիների հոտի մեջ նա երբեք չի երևում: Պատմականորեն այդպիսին է նաեւ Ռուսաստանի կերպարը,  դաշնակից չի ընտրում, որովհետև ունի ինքնուրույն զարգանալու և ապրելու գրեթե բոլոր հնարավորությունները: Ու քանի որ քաղաքականության մեջ առավել եւս պատահական ոչինչ  տեղի չի ունենում՝ ոչ որեւէ  շարժ, որեւէ հայտարարություն ու ոչ մի խոսք, հետեւաբար խիստ խորհրդանշական է գեներալ Մանվել Գրիգորյանի համեմատությունը վարչապետ Կարեն Կարապետյանի վերաբերյալ: Մարտի 5-ին սպարապետ Վազգեն Սարգսյանի ծննդրան օրվա առիթով Եռաբլուր պանթեոն այցելած Մանվել Գրիգորյանից լրագրողները հետաքրքրվեցին, թե ինչպե՞ս կմեկնաբանի վարչապետի՝ ԱԺ-ում արած այն հայտարարությունը, որ վատ վառելիքի պատճառով ապրիլյան պատերազմի ժամանակ ռազմական տեխնիկան չի աշխատել: Նա պատասխանել է. «Ես ամսի 2-ից այնտեղ եմ եղել, նման տեխնիկա չեմ տեսել, որ վառելիքի խնդիր լիներ: Ես անձամբ չեմ տեսել»: Երբ լրագրողներն ընդգծել են, որ վարչապետն անձամբ է ասել նման բան՝ գեներալ Մանվելն արձագանքել է. «Վարչապետ ա, կարա հայտարարի, կարա՝ չհայտարարի: Տենց մի հատ խոսք կա՝ ասում ա՝ արջը մեծ գազան է, ինչ ուզի՝ կանի»: Հիշեցնենք, որ անցած շաբաթ վարչապետը ԱԺ-ում հարցուպատասխանի ժամանակ սկանդալային բացահայտում է արել: «Ապրիլյան պատերազմի օրերին մենք ունեինք բազմաթիվ դեպքեր, երբ մեր ռազմական տեխնիկան չէր աշխատում այդ պատճառով»,- ասել է նա: Պատճառը ըստ գործադիրի ղեկավարի՝ բանակն ունեցել է վառելիքի խնդիր, ինչի պատճառով ռազմական տեխնիկան հնարավոր չի եղել աշխատեցնել: Պարզվում է՝ դիզվառելիքի հետ կերոսին են խառնում, եւ շուկայում այդպես անորակ վառելիք վաճառում: Գեներալի համեմատությունը խիստ ուշագրավ է դառնում հատկապես  վերջին ժամանակները հաճախակի հնչող  այն լուրերի համատեքստում, որ  Կարեն Կարապետյան-Սերժ Սարգսյան հարաբերությունները այնքան էլ հարթ չեն, ինչը երևում է նաեւ ՀՀԿ ընտրական ցուցակից, որտեղ վարչապետի թիմից հաշվված ներկայացուցիչներ են գործուղված, սա այն պարագայում, երբ Կարեն Կարապետյանի ՀՀԿ-ամուտը աննախադեպ շռնդալից էր, նրան հետեւեցին ավելի քան 7000-ը: Խոսվում է նաև, որ վարչապետը քաղաքական հեռահար նկրտումներ ունի եւ չի պատրաստվում հեշտորեն հանձնվել,  2018-ից հետո էլ պայքարելու է վարչապետի պաշտոնի համար: Մանվել Գրիգորյանը արդյոք գիտակցաբար փորձել է գաղտնազերծե՞լ  Կարեն Կարապետյանի միայնակ խաղը, թե նա էլ շատ ու շատ ՀՀԿ-ականների պես նեղն ընկած պահին ապավինել է թիմի հավատարիմ կենդանուն՝ արջին: Գաղտնիք չէ, որ համապետական բոլոր կեղծված ընտրությունների արդյունքում ստանալով իրեն անհրաժեշտ արդյունքը, իշխանությունը «մեծահոգաբար» ընդունում է, որ եղել են խախտումներ: Սակայն այդ  խախտումները բնորոշվում են արջի ծառայություն, դրանց հեղինակները՝ արջի ծառայություն մատուցող: Քանի արջը կա, ՀՀԿ-ն իր սեւ գործն է անելու: Մյուս կողմից իշխանության ներսում վարչապետը իսկապես <<արջային>> կարգավիճակում է հայտնվել: Բանն այն է, որ կերոսինի մասին նրա հայտարարությունը թեպետ ոմանք վերագրեցին իբրեւ մեսիջ, զգուշացում պաշտպանության նախկին նախարար Սեյրան Օհանյանին, ով ընդդիմադիր արշավանքներ է սկսել, սակայն հակառակ դաշտից պատասխան հնչեց, որ այդ ամենի համար նախեւառաջ պատասխանատու է  բանակի գերագույն հրամանատարը՝ Սերժ Սարգսյանը: Եռաբլուրում, ի դեպ, նույն օրը Սեյրան Օհանյանը գրեթե երկրորդել էր այդ տեսակետը: «Եթե ուզում են կարգուկանոն հաստատել, թող զբաղվեն իրենք դրանով: Դա իմ դեմ ուղղված քայլ չեմ կարող համարել, որովհետեւ իմ գործունեության ընթացքում համապատասխան վերահսկող մարմինները ստուգումներ են իրականացրել՝ սկսած պետական մարմիններից, վերջացրած գլխավոր ռազմական տեսչությունը, որոնք ԶՈՒ նկատմամբ քաղաքացիական վերահսկողության մաս են կազմում»,- ասել է նա: Անի Սահակյան