Եթե Հրանտ Թոխատյանի նման «շպիոններ» մի քիչ շատ լինեին այստեղ, «Հաց բերողն» արդեն ազատության մեջ կլիներ

8 օր շարունակ Ազատության հրապարակում նստացույց անող երիտասարդների պահանջը ոչ թե նստացույցի միջոցով անազատության մեջ գտնվող Արթուր Սարգսյանին ազատ արձակելն է, այլ ինչպես հավաքել, համախմբել մարդկանց, ովքեր մտահոգ են, ովքեր ցանկանում են պայքարել։ «Մենք պայքարի ճանապարհ ենք ցույց տալիս, եթե չեն ընդունում, դա այլ հարց է։ Ուզում է 30 հոգով տարիներ շարունակ մնանք այստեղ, չենք կարող խնդիրը լուծել։ 30 հոգին դեռ հանրային ճնշում չէ»,- Aysor.am-ի թղթակցի հետ զրույցում ասաց նստացույցի մասնակից Շահեն Հարությունյանը։ Նա ասաց, թե իրենց շարունակում է աջակցություն ցուցաբերել դերասան Հրանտ Թոխատյանը, եկել են Անահիտ Բախշյանը, Հովսեփ Խուրշուդյանը, Արմեն Մարտիրոսյանը, Պարույր Հայրիկյանը, Եղիշե Պետրոսյանը, Ռուբեն Հախվերդյանը, «Ազատ դեմոկրատներ» կուսակցությունից ներկայացուցիչներ, երեկ իրենց են այցելել Նիկոլ Փաշինյանը, Արամ Սարգսյանը։ «Հրանտ Թոխատյանը բացառիկ ազդեցություն է ունենում մեր պայքարում։ Մարդիկ ասում են, թե նա Հանրապետականի մանդատով է Երևանի ավագանի ընտրվել, կամ ներդրված է Հանրապետականի կողմից որպես շպիոն, ուզում եմ կոչով դիմել այդ մարդկանց. Ժողովուրդ ջան, եթե Հրանտ Թոխատյանի նման «շպիոններ» մի քիչ շատ լինեին այստեղ, Արթուր Սարգսյանն արդեն հացադուլից դուրս եկած կլիներ ու ազատության մեջ կլիներ», - ասաց Շահեն Հարությունյանը։ Նա նշեց, որ դերասանը նստացույցի մասնակիցներին աջակցում է թե՛ ֆիզիկապես, թե՛ ֆինանսապես։ «Ամեն գիշեր մեզ հետ է՝ երեկ էլ կնոջ ու մանկահասակ երեխայի հետ էր այստեղ, դա բարոյական աջակցություն է արդեն։ Դա մեզ դուխ է տալիս։ Այդ մարդն ամեն հնարավոր տարբերակով մեզ աջակցում է», - ասաց Շահեն Հարությունյանը։ Ակտիվիստն ասաց, որ որոշակի ֆինանսական աջակցություն ստանում են քաղաքացիներից։ Գիշերվա ընթացքում շուրջ 30 հոգի լուսացնում է Ազատության հրապարակում։