Սպարապետի հայտնի խոսքերը

Այսօր Հայաստանի Հանրապետության Սպարապետ Վազգեն Սարգսյանի ծննդյան 58-րդ տարեդարձն է: Ներկայացնում ենք Սպարապետի հայտնի խոսքերը:  «Ես զբաղվում եմ քաղաքականությամբ, որպեսզի «Երկրապահը» քաղաքականությունից հեռու մնա»: «Ինձ ժողովուրդը չի ճանաչում, ինձ նորմալ ճանաչում են իմ նեղ շրջապատի մարդիկ: Մնացյալը գիտեն ինձ մորուքով, գիտեն ջղայնացած, գիտեն քրտնած, այսօրվա կերպարը դա է: Ինձ չեն հասկանում, ինձնից վախենում են: Իրենց համար արջի կերպար են ստեղծել ու իրար վախեցնում են: Մէկ-մէկ ես էլ եմ վախենում, որ չեմ հասցնի, որ ժամանակ չեմ ունենա, ցանկություն չեմ ունենա, չգիտեմ էլ ինչ չեմ ունենա ժողովրդին ասելու` ա՜յ ժողովուրդ, իրար հասկանանք, ճիշտ հասկանանք իրար, ես Աստված չեմ, ես զինվոր եմ, ես Հայ եմ»: «Ընդունում եմ, որ հեռուստատեսությունը ոչ միշտ է, որ իրականացնում է պետական գաղափարախոսություն։ Սա, ցավոք, նաեւ մեր բացթողումն է, քանի որ հեռուստատեսությունն իր գոնե 7 ժամով պիտի աշխատի հստակ պետպատվերով։ Որեւէ ձեւավորված պետպատվեր չկա։ Աշխատանքի ֆինանսավորումն արվում է ապրիորի։ 2000 թվականի բյուջեով մենք արդեն հստակ խնդիրը դրել ենք՝ որեւէ հաղորդում պետպատվերով չի ֆինանսավորվի, եթե այն ձեւավորված չլինի։ Պահանջ չի եղել՝ մատուցումն էլ վատն է։ Կա ե՛ւ մեր մեղավորությունը, ե՛ւ իրենց։ Կփորձենք 2000 թվականին շտկել»: «Ես աշխարհում ամենից շատ սիրում եմ ծերերին և երեխաներին, այդ երկուսն են անպաշտպան»: «Անթույլատրելի է ունենալ հողատեր , բայց գործազուրկ գյուղացի»: «Յուրաքանչյուր ժողովուրդ, լինի 3 միլիոնանոց, թե 300 միլիոնանոց, միշտ իր միջից կարող է հանել այնքան մարդ, որոնք կարող են երկիրը պահպանել»: