Վովան «արցունքներին» չի հավատում
Նախընտրական կրքերը չեն հանդարտվում Մասիսի Սայաթ Նովա գյուղում երեկվա դանակահարությունից հետո: ԲՀԿ-ական պատգամավոր Նաիրա Զոհրաբյանը պնդում է միջադեպի քաղաքական դրդապատճառների մասին, հակառակ կողմն ու իրավապահներն էլ համառորեն հերքում են տիկնոջը: Դանակահարվածը «Ծառուկյան դաշինք»-ի աջակից է, Նաիրա Զոհրաբյանը վստահորեն հայտարարում է, որ նրան դանակահարողը Մասիսի շրջանում ՀՀԿ-ի ռեյտինգային թեկնածու Մուրադ Մուրադյանի թիմակիցներն են: «Ես հորդորում եմ բոլոր քաղաքական ուժերին, հատկապես տեղերում իրենց ամենակարող համարող թեկնածուներին՝ դուք լավություն չեք անում անգամ ձեր կուսակցությանը, որովհետև այս ամենը արձանագրվում է միջազգային դիտորդական առաքելությունների կողմից, և դրանով դուք ստվերում եք ձեր կուսակցության հեղինակությունը և կոչերը ազատ ու թափանցիկ ընտրություններ անցկացնելու մասին»- ասում է Նաիրա Զոհրաբյանը: ՀՀԿ-ում չեն տրվում սադրանքներին: Էդուարդ Շարմազանովը Մասիսում դանակահարության միջադեպին անդրադառնալով, ասում է, որ իրավապահ մարմիններն են զբաղվում եւ համապատասխան մարմիններն էլ գնահատական կտան.«Նաիրա Զոհրաբյանը Հռոմի պապ չի, որ ինչ ասի, մենք ընդունենք: Նաիրա Զոհրաբյանը հարգարժան գործընկեր է, իր կարծիքն ասել է, իրավապահ մարմիններն էլ կասեն: Նաիրա Զոհրաբյանն ասեց… Այսինքն` Նաիրա Զոհրաբյանի համար Էդուարդ Շարմազանովի ասածը հի՞մք է: Շատ հարգանք ունենալով Նաիրա Զոհրաբյանի հանդեպ, այնուամենայիվ Նաիրա Զոհրաբյանի ասածներն ինձ համար վերջին ճշմարտություները չեն» միջադեպի քաղաքական աստառի մասին Զոհրաբյանի գնահատականին է անդրադառնում Շարմազանովը: Իհարկե, մենք հակված չենք կարծելու, թե ՀՀԿ-ում հավաքվածները բոլորն էլ հրեշտակներ են ու մեջքներին էլ թեւեր են կրում, քանզի ընտրարշավը դեռ պաշտոնապես չմեկնարկած նման երկու-երեք միջադեպի մասին է հայտնի դարձել՝ Մասիսի, Արագածոտնի: Այդուհանդերձ սա այն դեպքն է, երբ բոլորը, բացի տիկին Զոհրաբյանից, պնդում են հակառակի մասին: Իրավապահ մարմինները նույնպես հաղորդագրություններ տարածեցին. «Կասկածյալի բացատրությամբ՝ դանակահարությունը կատարվել է միջանձնային հարաբերությունների հետևանքով: Բայց մինչ դեպքի բացահայտման ուղղությամբ անհրաժեշտ միջոցառումներ էին ձեռնարկվում, միջադեպը արհեստականորեն ուռճացվեց զանգվածային լրատվության միջոցներում և հանրային հնչողություն ստացավ որպես միջկուսակցական հակամարտության դրսևորում: Ոստիկանությունը քաղաքական ուժերի և զանգվածային լրատվության միջոցների ներկայացուցիչներին կրկին կոչ է անում զերծ մնալ արհեստականորեն կրքեր բորբոքելու, ներհասարակական իրավիճակը սրելու, հանրության մեջ հակամարտություն հրահրելու անպտուղ ու անընդունելի փորձերից»,- հորդորեցին Ոստիկանությունից: Դրանից հետ Նաիրա Զոհրաբյանը հրապարակային եւս պնդեց քաղաքական շարժառիթի իր վարկածը՝ ըստ էության ցույց տալով, որ չի հավատում ոստիկանությանը: Այստեղ նուրբ պահ կա, քանի որ Մուրադ Մուրադյանի թիմի անդամ է ոստիկանապետի թիկնազորի պետ Արշակ Հակոբյանի փեսան Դավիթ Համբարձումյանը, որը Մասիսի քաղաքապետն է: Կարելի է հասկանալ թերահավատության հիմքը, քանզի շահարկվելու է նաեւ Գասպարյանի անունը: Բայց նույն պնդմամբ հանդես եկավ նաեւ Քննչական կոմիտեն.«Փետրվարի 28-ին հնչեցված հայհոյանքի համար տուժողը հանդիպել է կասկածյալին՝ պարզաբանումներ ստանալու նպատակով, որի ժամանակ բռունցքով հարվածներ են հասցվել կասկածյալին։ Առաջացած քաշքշոցի ժամանակ դանակի մեկ հարված է պատճառվել տուժողին»,-ասված է ՔԿ-ի հաղորդագրության մեջ։ Վլադիմիր Գասպարյանի եւ Աղվան Հովսեփյանի հակամարտությունը հաստատապես թույլ չէր տա կոծկել իրականությունը, այն չէր խանգարի նաեւ ՀՀԿ-ին, եթե պարզվեր, որ միջադեպը քաղաքական է ու դրա մասին բարձրաձայնելու կամք կա: Հակառակը նույնիսկ իշխող ուժը կշահեր այդ ամենից: Սակայն եղավ այն, ինչ եղավ: Այստեղ հետաքրքրական մի փաստ էլ կա,ինչու տիկին Զոհրաբյանի կուսակիցները եւ առհասարակ ընդդիմադիր գործընկերները չեն միանում ՀՀԿ-ի դեմ արշավին, դատապարտում կատարվածը, քանզի իրենք նույնպես երաշխավորված չեն նման դեպքերից: Իսկ ամենաանսպասելին Վլադիմիր Գասպարյանի անդրադարձն է, ով այսօր աշխատանքային այցով եղել է Արագածոտնում ու անձամբ խոսել Սայաթ Նովայում կատարվածի մասին. «Խոսքն այն մասին է, որ այս կամ այն տեղերում ընդհարումներ են տեղի ունենում՝ դանակահարություն, կռիվներ եւ միանգամից լրատվական դաշտը լցվում է տեղեկատվությամբ, որ այս կամ այն կուսակցության ներկայացուցիչները բախումների են գնացել: Հավատացեք ինձ, արջի ծառայություն մատուցողները շատ շատ են: Վերջին հայտարարությունները ցույց տվեցին, որ այն միջանձնային հարաբերությունների արդյունքում է տեղի ունեցել,սակայն շտապում են հայտարարել, թե քաղաքական նկատառումներով է լինում»,- ասաց Գասպարյանը՝ ցույց տալով, որ ինչպես տիկին Զոհրաբյանը իրեն չի հավատում, այնպես էլ ինքը նրա արցունքներին: Արման Վարդանյան
Հետևեք մեզ Viber-ում
