Հայաստանը ԵՄ­-ի համար կարող է լինել վստահելի ու կանխատեսելի հարևան. Սերժ Սարգսյան

Հայաստանի և Եվրոպական միության միջև համապարփակ և ընդլայնված գործընկերության շրջանակային համաձայնագրի շուրջ բանակցությունները տեղի են ունեցել երկու կողմերի բարի կամքի դրսևորման արդյունքում: Նման հայտարարությամբ Euronews­ի հետ զրույցում հանդես է եկել ՀՀ Նախագահ Սերժ Սարգսյանը: «Այս համաձայնագիրն այդքան էլ շատ չի տարբերվում նախորդից: Քաղաքական մասում գրեթե տարբերություն չկա: Ինչ վերաբերում է տնտեսական մասին, մենք պետք է խուսափեինք Եվրասիական տնտեսական միության նկատմամբ մեր պարտավորությունների հետ հակասություններից: Ի սկզբանե, երբ բանակցություններ էին ընթանում, հայկական կողմը խոսում էր «և՛, և՛»­ի մասին: Հասկանում էինք, որ չէինք կարող ունենալ և՛ Եվրամիության հետ ասոցացման համաձայնագիր, և՛ Եվրասիական տնտեսական միության հետ սերտ ինտեգրացիա, որին մենք ձգտում էինք: Ռուսական կողմը մեզ երբեք չի ասել, որ մենք նման համաձայնագիր չենք կարող ստորագրել: Նրանք մեզ ասացին, որ «կարող եք, եթե ցանկանում եք, սակայն այդ դեպքում էներգակիրները պետք է գնեք միջազգային գներով:­ Դեռևս վաղ է խոսել ԵՄ­ի և ԵԱՏՄ­ի համարժեքության մասին: Ավելի լավ է հիմա խոսել այդ երկու համակարգերի միջև համագործակցության մասին: Մենք մեր օրինակով ցույց ենք տալիս, որ այդ համագործակցությունը հնարավոր է»,­-ասել է Սերժ Սարգսյանը: