Կարապետյան եղբայրների անկեղծության պահը

Ներիշխանական հակասություններն այն աստիճան են սրվել, որ այսօր ԱԺ ՀՀԿ խմբակցության պատգամավոր Կարեն Կարապետյանն Ազգային ժողովում հանդես եկավ աննախադեպ անկեղծությամբ ու հարազատ կուսակցության հասցեին անթաքույց քննադատությամբ։ Կարեն Կարապետյանը չհերքեց ՀՀԿ-ի նկատմամբ հանրային դժգոհության փաստը, որը նաև իր ձայների վրա կարող է ազդել։ «Չկա մի երկիր, որ իր իշխանությանը սիրի՝ օբյեկտիվ և սուբյեկտիվ պատճառներով։ Օբյեկտիվ պատճառը տարիներ շարունակվող մասսայական թալանն է։ Նման մարդկանց ձեռքերը պիտի բռնել։ Պետական ինստիտուտներում այդպիսի մարդիկ պետք է տեղ չունենան։ Ուզում են լավ ապրեն, խելոք են, կա բիզնես դաշտ, խնդրեմ, գնացեք ձեր ուղեղն ու պոտենցիալը դրեք այնտեղ, ոչ թե պետական ռեսուրսներն ու գործիքները ձեր անձնական շահերը սպասարկելու համար օգտագործեք», – առաջարկեց պատգամավորը: Կարեն Կարապետյանը զգուշացրեց, որ անհատների մասին դեռ չի խոսում, երբ որ դրա կարիքը լինի, անհատներին ևս կանդրադառնա, ոչ մեկից չի վախենում, առայժմ երևույթին է անդրադառնում: Պետք է, նրա խոսքով, այդ դաշտը սեղմել: Կարեն Կարապետյանը ընդհուպ հայտարարեց, թե իրեն իշխանության ներկայացուցիչ չի համարում․«Եթե մենք իշխանության իբրև ներկայացուցիչներ ենք, չնայած՝ էդքան էլ ինձ էդպիսին չեմ համարում, թող այս պահին մեզ պատժեն։ Ես ինձ շատ պետական գործիչ եմ համարում, քան կուսակցական, որովհետև շատ լավ հասկանում եք, որ շատ դեպքերում կուսակցությունները նեղ կուսակցական շահերից ելնելով՝ այս կամ այն խնդիրների շուրջ երբեմն այնպիսի մոտեցումներ են ցուցաբերում, որ հակասում է պետության շահերին»։ Կարեն Կարապետյանի խոսքով՝ ՀՀԿ անդամ լինելն իրեն խանգարում է նվազ ձայներ ստանալու առումով: «Հանրության մեջ լուրջ դժգոհություններ կան, բնականաբար դա իր ազդեցությունը կթողնի նաև իմ ռեյտինգային վարկանիշի վրա»։ Կարեն Կարապետյանն ինչպես ինքն ասաց՝ «սպիտակ աղավնի» չէ, սակայն բոլորը գիտեն նաեւ Կարապեպետյան եղբայրների Հայաստանում եւ Արցախում կատարած ահռելի ներդրումների մասին։ Նրանք Հայաստանի նորագույն պատմության ողջ ընթացքում կարելի է ասել տնտեսության դոնորներն են եղել։ Վերջին աջակցությունը ՀԷՑ-ի «փրկությունն» էր։ Վերջին հաշվով, փաստը, որ Կարապետյան եղբայրները Հայաստանում առաջնորդում են միլիարդատերերի ցանկը, սակայն դա նրանցից մեկին՝ Կարեն Կարապետյանին, որը ներգրավված է քաղաքական գործընթաներին, չի կաշկանդում հաճախակի հանդես գալ իշխանության հասցեին առողջ եւ օբյեկտիվ քննադատությամբ, նշանակում է, որ Կարապետյաններն այնքան խոցելի չեն, որքան մյուսները։ Հայաստանում գաղտնիք չէ, որ ամենաանազատ խավը օլիգարխներից ու մեծահարուստներից է բաղկացած, որոնց մի անզգույշ խոսքը, վրիպումը կարող է ճակատագրական դառնալ, մեկ րոպեի ընթացքում փոխվել բախտի անիվը՝ երբեմնի հաջողված գործիչից, բիզնեսմենից վերածելով շարքային ընչազուրկի։ Ստացվում է, որ խոսակցությունները, թե Կարապետյան եղբայրները հատկապես վերջին տարիներին դարձել են ոչ միայն Հայաստանի տնտեսական, այլեւ քաղաքական գծի թելադրողները, իրականում միֆ է։ Որ նրանք միայն «փող» ներդրողներ են, իսկ այդ կուրսը որոշվում է հայտնի վայրում։ Թերեւս սա է Կարեն Կարապետյանի պոռթկման եւ ինչ որ առումով սպառնալու պատճառը, թե ապագայում նաեւ անուններ կհրապարակի։ Ի վերջո, իրենք միայն անհատակ քսակ չեն, որոնք նեղ պահերին ձեռք են մեկնում իշխանություններին, սակայն որոշումների վրա զրո ազդեցություն ունենում։ Ավելին նրանց անգամ փորձում են խանգարել, որի մասին ակնարկեց Կարապետյանը՝ խոսելով վարչապետի գործունեության մասին։ Բոլորը գիտեն, որ Կարեն Կարապետյանին վարչապետ «նշանակողներն» էլ Կարապետյան եղբայրներն են։ Այնպես որ՝ հետաքրքրիր զարգացումներ են սպասվում, քաղաքականության մեջ ոչինչ պատահական չի լինում, ինչպես ընտրություններից առաջ այս անկեղծացումը: Անի Սահակյան