Չի կարելի ձայնը ծախել.Անահիտ Բախշյան

«Ազատ դեմոկրատներ» կուսակցության վարկանիշային ցուցակով Մալաթիա, Շենգավիթ համայնքում պատգամավորի թեկնածու առաջադրված Անահիտ Բախշյանը Հայելի ակումբում  լրագրողների հետ հանդիպման ժամանակ նշեց.«Ընտրությունների օրինական ընթացքի վերաբերյալ ես շատ լուրջ մտահոգություն ունեմ, որովհետև անձամբ ես՝ որպես Մալաթիա, Շենգավիթ համայնքում «Ազատ դեմոկրատների» վարկանշային ցուցակի անդամ, չեմ կարողանում շտաբ գտնել, տեղերն ազատ են, բայց չեն տալիս»: «Հարցնում են՝ ո՞ր կուսակցությունից եմ, ու իմանալով, որ «Ազատ դեմոկրատներ» կուսակցությունն ընդդիմություն է՝ մերժում են։ Մեկը, հենց հմացավ, որ ընդդիմադիր կուսակցություն  է, ասաց՝  «Չէ՛, չէ՛, չէ՛, ես հանրապետական եմ, ես երկու պարանի վրա չեմ խաղում»։ Ասացի՝ ամբողջ Հայաստանը 12 պարանի վրա է խաղում, դու էլ երկուսի վրա խաղա։ Ասաց՝ «չէ՛, խոսք եմ տվել, չեմ տա»։ Մյուսն ասաց. «Հագուստի խանութ եմ բացում, չեմ տա»։ Բայց մոտակա մի ամսում հաստատ չի բացի»,պարզաբանեց տիկին Բախշյանը: «Իշխանությանը ցույց եմ տալու, որ առանց շտաբի, առանց իրենց կեղտոտ քայլերի՝ մենք մեր գործն անելու ենք։ Կարծում եմ՝ ժողովուրդը մեզ ավելի է վստահելու, քան շտաբներ ունեցողներին»։ «Հերթական այս ընտրություններն առաջացնում են հերթական անխուսափելի պառակտումները։ Կա մի նոր տեսակի պառակտում․ երեկ լսեցի, որ մի գյուղում կա 8 թեկնածու Հանրապետական կուսակցությունից,  և այս ընտանիքների անդամներն իրար դեմ լարված են։ Սա շատ վտանգավոր երևույթ է։ Տա Աստված՝ խաղաղ անցնի, ոչ մեկի մազը չծռվի»,- ասաց Անահիտ Բախշյանը։ «Չի կարելի ձայնը ծախել: Ձայնը ծախել՝ նշանակում է՝ քեզ ծախել, այսինքն՝  արժանապատվություն չունենալ։ Մարդը իրեն պիտի հարգի», -ասաց նա: