Ալիկ Սարգսյանը բութ առարկայով հարվածել է բնակչի գլխին, իսկ մեկ այլ Սարգսյան էլ՝ դանակով կրծքավանդակին ու թիկունքին

SHAMSHYAN.com-ի տեղեկություններով՝ երեկ փետրվարի 27-ին, ոստիկանության Արարատի մարզային վարչության քրեական հետախուզության բաժանմունքի աշխատակիցները ստացված օպերատիվ տվյալներն իրացնելիս՝ մարզային ոստիկանություն են հրավիրել Արարատի մարզի Ոստան գյուղի բնակիչ, 28-ամյա Ալիկ Նազարյանին: Ինչպես հայտնում է ֆոտոլրագրող Գագիկ Շամշյանը, վերջինս ոստիկանությանը հայտնել է, որ 2016 թ.-ի դեկտեմբերի 1-ից 5-ն ընկած ժամանակահատվածում, կոնկրետ օրը չի կարող ասել, Արարատի մարզի Բերքանուշ գյուղի գյուղապետարանի դիմաց իր հետ վիճաբանել են նույն գյուղի բնակիչներ, 28-ամյա Ալիկ Սարգսյանն ու 52-ամյա Հարություն Սարգսյանը: Վիճաբանության ընթացքում, ըստ Ա. Նազարյանի հաղորդման, Ա. Սարգսյանը բութ առարկայով հարվածել է իր գլխին, իսկ Հ. Սարգսյանը դանակով մի քանի անգամ հարվածել է իր կրծքավանդակին և թիկունքին: Փաստի առթիվ ոստիկանության Արարատի բաժնի հետաքննչական բաժանմունքում նյութեր են նախապատրաստվում: Ոստիկանները հայտնաբերել են Հ. Սարգսյանին, ում հետո ստորագրությամբ ազատ են արձակել: Ձեռնարկվում են օպերատիվ գործողություններ՝ Ա. Սարգսյանին հայտնաբերելու ուղղությամբ: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: