Ուրիշին սևացնելով մենք բնավ չենք բյուրեղանում. Շարմազանով

Առաջիկա ընտրություններին Հանրապետականը հանրությանը ներկայանալու է մրցունակ քաղաքական թիմով, իրատեսական ու հավակնոտ ծրագրերով, որը զերծ կլինի ականջահաճո խոստումներից: Այս մասին հայտարարել է ՀՀ Ազգային ժողովի փոխնախագահ Էդուարդ Շարմազանովը ԱԺ հայտարարությունների ժամին։«Մեր կարգախոսը բազմաթիվ մարդիկ քննադատեցին, բայց պետք է հիշել Թետչերի խոսքերը. «Եթե իշխանությունները նույնիսկ քայլեն գետի վրայով, կգտնվեն ընդդիմադիրներ, որոնք դա կբացատրեն իշխանությունների` լողալ չիմանալով»,- ասաց Շարմազանովը: Ինչպես ասաց՝ շուտով կմեկնարկի խորհրդարանական ընտրությունների նախընտրական քարոզարշավը, որտեղ հուսով եմ առաջնայինը կլինի պայքարը ոչ թե անձերի, այլ գաղափարների միջև: Խորհրդարանական ընտրարշավի  դերակատարներից յուրաքանչյուրը կփորձի հանրությանը ներկայացնել իր ծրագրային առաջնահերթությունները: «Հանրապետականը հանրությանը ներկայանալու է մրցունակ քաղաքական թիմով, իրատեսական ու հավակնոտ ծրագրերով, որը զերծ կլինի ականջահաճո խոտումներից: Այս տարիների և, մասնավորապես, վերջին ամիսների ընթացքում մենք ամրապնդել և տեխնիկական վերազինում ենք իրականացրել առաջնագծում, որի վառ ապացույցն է Ադրբեջանի ձախողված դիվերսիայի փորձը... Կոչ եմ անում յուրաքանչյուրիս ստորադասել կուսակցական շահը և առաջնորդվել Հայրենիքի շահի գերակայությամբ: Զերծ մնանք հայհոյանքից ու վիրավորանքից: Ուրիշին սևացնելով մենք բնավ չենք բյուրեղանում», իր ելույթը եզրափակեց նա: