Մենք դեռևս նախադեպը չենք ունեցել. Սուրենյան

«Երեւանի ցածրադիր հատվածներում արդեն մի քանի օր հաստատված մառախուղը անոմալիա է», երեկ այս մասին ասաց ՀՀ արտակարգ իրավիճակների նախարարության «Հիդրոմետ» ծառայության օդերեւութաբանության կենտրոնի պետ Գագիկ Սուրենյանը՝ արձանագրելով, որ մառախուղը դեռ ցրվելու միտք չունի։ «Գիտականորեն բացահայտված է այսպիսի մառախուղի առաջացման պատճառը, բայց մենք նախադեպը չենք ունեցել, փետրվարին մառախուղը առավոտյան լինում էր, հետո ցրվում։ Սա աննախադեպ է, որ փետրվարի վերջին տասնօրյակում մառախուղը նստի ու փակի ջերմության մուտքը։ Մեր ուսումնասիրությունները ցույց են տալիս, որ վերջին 100 տարվա ընթացքում նման բան չի եղել փետրվարի վերջին»,- նկատեց օդերեւութաբանը շարունակելով. «Սրա պատճառը կարող է Արարատյան դաշտի ձնածածկույթը լինել։ Ձյան ծածկի առկայությամբ պայմանավորված՝ երկրի մակերեւույթը չի տաքանում, հետեւաբար ավելի սառն է լինում, քան ներխուժող օդը։ Երկու տարբեր օդային հոսանքներ շփվում են իրար հետ, տաքը խտանում է ու մառախուղի ձեւով արտահայտվում։ Եթե ձյունը չլիներ, այսպես չէր լինի»։ – Պարոն Սուրենյան, այս պահին դժվա՞ր է ասել, թե երբ կցրվի մառախուղը։ – Այս պահին ոչ մի դրական կանխատեսում այդ մասով չկա։ Տաք օդի ներհոսքը շարունակվում է, բայց այդ օդը վերեւով անցնում է, ներքեւ չի իջնում։ Դրա հետեւանքով Երեւանի ցածրադիր հատվածում ջերմաստիճանն ավելի ցածր է (-3), քան հանրապետության ամենացուրտ հատվածում՝ Աշոցքում (+1)։ Լեռնային մարզերում եւս ջերմաստիճանն այս պահին մի քանի անգամ ավելի բարձր է, քան Արարատյան դաշտում եւ Երեւանում։ Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում