Խոշոր ավտովթար Վայոց Ձորում. 33-ամյա վարորդը Mercedes-ով հայտնվել է Արփա գետում. ՖՈՏՈՌԵՊՈՐՏԱԺ

Այսօր՝ փետրվարի 28-ին, խոշոր ավտովթար է տեղի ունեցել Վայոց Ձորի մարզում։ Ժամը 01։30-ի սահմաններում Կոտայքի մարզի Բուժական գյուղի բնակիչ, 33-ամյա Զոհրաբ Զաքարյանը իր վարած Mercedes մակնիշի 34 RM 288 համարանիշի ավտոմեքենայով Երևան-Մեղրի ավտոճանապարհի 110.8 կմ-ին դուրս է եկել ճանապարհի երթևեկելի գոտուց և կողաշրջված վիճակում հայտնվել Արփա գետում։ Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով Զ. Զաքարյանն ու նրա ուղևոր՝ Վայոց Ձորի մարզի Աղավնաձոր գյուղի բնակիչ, 25-ամյա Գևորգ Նազարյանը մարմնական վնասվածքներով տեղափոխվել են Եղեգնաձորի բժշկական կենտրոն։ Վիրավորներին գետից դուրս են բերել Արտակարգ իրավիճակների նախարարության փրկարար ծառայության Վայոց Ձորի մարզային փրկարարական վարչության և նույն վարչության Եղեգնաձորի հրշեջ-փրկարարները՝ մարզային փրկարարական վարչության պետ Տիգրան Պետրոսյանի գլխավորությամբ։ Օպերատիվ են գործել նաև Եղեգնաձորի շտապօգնության հերթապահ խումբը։ Դեպքի վայր են ժամանել Ճանապարհային ոստիկանության 2-րդ սպայական գումարտակի 6-րդ վաշտի 1-ին դասակի աշխատակիցները՝ վաշտի հրամանատար Անդրանիկ Շաղոյանի, հրամանատարի տեղակալ Գեղամ Մարգարյանի, դասակի հրամանատար Կարեն Օհանյանի գլխավորությամբ։ Վթարի մասին ՃՈ օպերատիվ կառավարման կենտրոնի պատասխանատու հերթապահ Գարիկ Հակոբյանը տեղեկությունը փոխանցել է ոստիկանության Եղեգնաձորի բաժին, որտեղից ժամանել է օպերատիվ խումբը՝ քրեական հետախուզության բաժանմունքի պետ Հ. Կոստանյանի գլխավորությամբ։ Փաստի առթիվ ՃՈ 2-րդ սպայական գումարտակի 6-րդ վաշտի հետաքննության գծով տեսուչ Ա. Մովսիսյանի կողմից նյութեր են նախապատրաստվում։ Բժիշկներն ասում էին, որ եթե փրկարարներն ու ճանապարհային ոստիկաններն օպերատիվ չգործեին, ապա գետում հայտնված վիրավորները կցրտահարվեին։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: Լուսանկարները՝ Գագիկ Շամշյանի