Լայնամասշտաբ ռազմական գործողություններ վերսկսելու պայմանները տեսանելի չեն. Արթուր Աղաբեկյան

Լայնամասշտաբ ռազմական գործողություններ վերսկսելու պայմանները տեսանելի չեն, Facebook-յան իր էջում գրել է Արցախի Հանրապետության փոխվարչապետ Արթուր Աղաբեկյանը։ «Պատերազմի վերսկսման մասին բարձրաձայնողներին, խնդրում եմ չահաբեկել Արցախում ապրող իմ հայրենակիցներին, մարտական հերթապահություն իրականացնող հազարավոր զինվորների ծնողներին և հարազատներին, և մեր ժողովրդին ընդհանրապես: Նախ 1991թ. սկսած պատերազմը դեռ չի ավարտվել, այսպես կոչված զինադադարի ռեժիմը խախտվել է անմիջապես զինադադարի կնքման օրվանից առ այսօր, և խախտվելու է դեռ տասնյակ տարիներ: Փոխվելու են զենքերն ու նրանց տրամաչափերը, տեխնիկան ու տեխնոլոգիաները, եթե այն դիտրակում ենք որպես ռազմական գործողություն, ապա այն ժամանակ առ ժամանակ տեղի է ունենալու:Լայնամասշտաբ ռազմական գործողություններ վերսկսելու պայմանները տեսանելի չեն»,-նշել է նա։ Արցախի փոխվարչապետը նշել է, որ Արցախում ապրողներն ընդմիշտ պետք է ազդակ հաղորդեն ժողովրդին, որ «սա մեր դառը և ծանր, բայց միևնույն ժամանակ պատվաբեր և պարտավորեցնող խաչն է»: «Իսկ եթե շատ եք ուզում, կարող եք անվանել նաև հարատև պայքար: Սա այն անխուսափելին է, որը կա այսօր և կլինի դեռ երկար ժամանակ», - գրել է նա։ Արթուր Աղաբեկյանը լավ լուր է հաղորդել իր հայրենակիցներին։ «Լավ լուր եմ ուզում հաղորդել իմ հայրենակիցներին՝ մի խումբ երիտասարդներ նախաձեռնել են «ԻՄ ԱՅԳԻՆ» հիմնադրամը, և երեկ՝ կիրակի օրով, ծառատունկ են կազմակերպել Արաքսի հովտում: Օրերս Արցախ էր ժամանել ռուսաստանաբնակ մեր հայրենակիցը՝ Ստեփանակերտում մեծ ներդրում կատարելու ցանկությամբ», - հավելել է Արցախի փոխվարչապետը։