«ՕՐՕ»-ից մինչեւ «Հաղթանակ»․ ինչպիսի՞ն էր դաշինքի առաջին համաժողովը

Օհանյան-Րաֆֆի-Օսկանյան դաշինքի անդրանիկ համաժողովը մեկնարկեց «Ժառանգություն», «Համախմբում», հաղթանակ խորագրով։ Համաժողովը բավականին բազմամարդ էր, Կարեն Դեմիրճյանի անվան մարզահամերգային համալիրի դահլիճը ամբոջությամբ լի էր հավաքվածներով։ Լիդերներից միայն Րաֆֆի Հովհաննիսյանն էր բացակայում, որը ԱՄՆ-ից տեսաուղերձով հանդես եկավ։ Համախմբում կուսակցության առաջնորդ Վարդան Օսկանյանը խոսեց իր կատարած աշխատանքների մասին՝ հայտարարելով, որ երբեք իր պաշտոնական դիրքը չի չարաշահել, երբեք չի ծառայել անձի, այլ պետությանն ու ժոովրդին։ «Երբ ես ավարտել եմ իմ պաշտոնավարումը, ինձ բազմիցս առաջարկվել է բարձր պաշտոններ, ես նախընտրել եմ դուրս մնալ իշխանությունից, որպեսզի ես իմ ներդրումն ունենամ քաղաքացիական հասարակության, ազատ մամուլի ու ընդդիմության ձեւավորման հարցում»,-ասաց Օսկանյանը։ Պաշտպանության նախկին նախարար, դաշինքի առաջին համարը զբաեցնող Սեյրան Օհանյանին ներկաները հոտնկայս դիմավորեցին։ Սեյրան Օհանյանը, ինչպես եւ իր տեսաուղերձներում, խոսեց երկար, բայց թերեւս ոչնչի մասին։ Նրա ելույթից թերեւս առանձնահատուկ էր այն, որ խոշոր խաղացող քաղաքական թիմերը պարտավոր են իրենց դիրքորոշումը հայտնել ԼՂ հարցի շուրջ։ Խոսելով իր եւ գործող իշխանությունների հետ հարաբերությունների մասին Օհանյանը շեշտեց, որ չնայած որեւէ մեկի հետ անձնական խնդիր չունի, բայց իրեն այլեւս չի տեսնում գործո իշխանության համակարգում։ Օհանյանը կրկին խոսեց այն մասին, որ իրեն բարձր պաշտոններ են առաջարկվել, բայց նա հրաժարվել է։ Տեղեկացնենք, որ մեզ հայտնի է դարձել, որ Օհանյանին առաջարկվել է ԶՈՒ ԳՇ պետի եւ ՀԱՊԿ գլխավոր քարտուղարի պաշտոնները, որոնց ոչ մեկը նախկին նախարարի սրտով չի եղել։ Համաժողովում այդպես էլ չհնչեցին ծրագրային ելույթներ։ Ավարտից հետո ե՛ւ Օսկանյանը, ե՛ւ Օհանյանը շտապեցին հեռանալ՝ հրաժարվելով լրագրողների հարցերին պատասխանելուց։ Սեդա Ղուկասյան