Արտակարգ իրավիճակ. մարդիկ ավտոմեքենաներով մնացել են ձնաբքի մեջ

Արդեն մի քանի օր է, արտակարգ իրավիճակը շարունակում է պահպանվել Լոռու մարզի Ուրցաձոր-Կաթնաղբյուր գյուղամիջյան ճանապարհին։ Բազմաթիվ անգամ թե էլեկտրոնային լրատվամիջոցներով և թե հեռուստատեսությամբ բարձրաձայնել ենք գյուղացիների բողոքը, որ Լոռու մարզպետարանի համապատասխան ծառայությունների չինովնիկները չեն փորձում նշված գյուղերի բնակիչներին օգնության ձեռք մեկնել։ Նրանց միակ խնդրանքն այն է, որ պատկան մարմինները հատուկ տեխնիկաների միջոցով գյուղերի ճանապարհից հեռացնեն մարդաբոյ ձյունը։ Ճանապարհի փակման պատճառով 2 գյուղերն են կտրվել են արտաքին աշխարհից։ Գյուղացիներն իրենց ուժերով են բահերով հեռացնում ճանապարհին կուտակված ձյունը, որը բերել-լցրել է ուժեղ բուքը։ Լոռու մարզպետ Արթուր Նալբանդյանը հունվարին հանձնարարեց և ճանապարհը մասամբ բացվեց, սակայն հետո մարզպետարանի այդ վայ-չինովնիկներն իրենց միսիան ավարտած համարեցին ու նորից գյուղի ճանապարհը վերածվեց «Սոդոմ-Գոմոր»-ի։ Երեկվանից մի քանի ավտոմեքենաներ մնացել են ձնաբքի մեջ, իսկ քաղաքացիներն էլ մի քանի կիլոմետր ոտքով են հասել տուն։ Գյուղացիները պատրաստվում են բաց նամակով դիմել վարչապետ Կարեն Կարապետյանին, որպեսզի կառավարությունը, իրենց լեզվով ասած, «մի մուշտի տա» այդ պատասխանատու չինովնիկներին, ովքեր «գյուղացու մատից փուշ հանելու փոխարեն կաբինետներում նստած իրենց թափաններն են լցնում»։