«Դիտավորությամբ չեմ ջարդել, ուզեցել եմ մատերիալները ջնջեմ»․ լրագրողի հեռախոսը ջարդելու դատական գործից մանրամասներ

Լոռու մարզի ընդհանուր իրավասության դատարանի Վանաձորի նստավայրում երեկ կայացել է երկրորդ դատական նիստը՝Վանաձորի ավագանու ընտրությունների ժամանակ Araratnews.am կայքի լրագրող Շողիկ Գալստյանի աշխատանքը խոընդոտելու դեպքի  առնչությամբ։ Հիշեցնենք, որ 2016 թվականի հոկտեմբերի 2-ին՝ Վանաձորի ավագանու ընտրությունների ժամանակ, Վանաձորի թիվ 30/47 ընտրատեղամասում քաղաքացիական անձինք խոչընդոտել էին Շողիկ Գալստյանի աշխատանքը, վիրավորել նրան, ջարդել հեռախոսը, որով նա նկարահանումներ էր իրականացնում: Ինչպես Hayeli.am-ի հետ զրույցում պատմեց Շողիկ Գալստյանը, դատական նիստի ժամանակ ոչ միայքն ինքը, այլեւ վկաները, ե՛ւ ամբաստանյալը ցուցմունքներով են հանդես եկել։ Գալստյանի խոսքով՝  ամբաստանյալ Մարիամ Ավագյանի եղբայրը՝ Ռոման Ավագյանը, որը եւս վկա է եղել, հրաժարվել է ցուցմունքով հանդես գալուց։ Ի դեպ, Ռոման Ավագյանն այդ ընտրատեղամասում ՀՀԿ վստահված անձ է եղել։ «Ցուցմունքով հանդես եկավ նաեւ Ոստիկանության Լոռու մարզային վարչության  Վանաձորի Տարոնի  բաժնի պետի՝ օպերատիվ գծով տեղակալ Վազգեն Թորոսյանը, որը եւս հաստատեց, որ Մարիամ Ավագյանը կոտրել է իմ հեռախոսը»,-պատմեց Շողիկը։ Տուժողի խոսքով՝  ամբաստանյալը մասամբ է ընդունել իր մեղքը: Ընդունում է, որ կոտրել է հեռախոսս, որով ես տեսանկարահանումներ էի իրականացնում, սակայն պխնդում է, թե դիտավորյալ չի արել եւ չի խոչընդոտել ինձ կատարելու իմ մասնագիտական պարտականությունները»,- պատմեց լրագրողը: Տուժողի խոսքով՝ ամբաստանյալն ինքն իրեն հակասող հայտարարություններով է հանդես եկել՝ ասել, որ նկարահանողին չի ընկալել որպես լրագրող, բայց միեւնույն ժամանակ նշել է, որ «վզից կախված լենտ» է տեսել, նաեւ հայտարարել է, որ չի ցանկացել տեսանկարահնաված նյութերը հրապարակվեն։ Շողիկ Գալստյանի շահերի ներկայացուցիչ Գրիշա Բալասանյանը մեզ հետ զրույցում ասաց, որ երեկվա դատական նիստի ժամանակ հրապարակվել են գործին կցված նյութերը, իսկ ամբաստանյալը մասմաբ է ընդունել իր մեղքը․ «Ընդունեց, որ հեռախոսը կոտրել է, բայց  հետաքրքիր ձեւով պատճառաբանեց՝ ասելով, որ դիտավորություն չեմ ունեցել հեռախոսը ջարդելու, ճիշտ է՝ խփել եմ գետնին, բայց կոտերլու նպատակ չեմ ունեցել ուղղակի ցանկացել եմ նյութերը ջնջել որովհետեւ տեղամասում նկարահանել են իմ առօրյան։ Իհարկե հարցերի միջոցով հստակեցվում էր, որ տեղամասում չի կարող առօրյա լինել, այն հանրային միջոցառում է»,-ասաց Բալասանյանը։ Տուժողի ներկայացուցչի խոսքով՝ հավանաբար մյուս դատական նիստին պաշտպանական ճառը կհնչի եւ մեղադրող դատախազի կողմից առաջարկվող պատժի վերաբերյալ միջնորդությունը։ Հիշեցնենք, որ դեպքի առթիվ Հատուկ քննչական ծառայությունը քրեական գործ էր հարուցել  Քրեական օրենսգրքի 149-րդ եւ 185-րդ հոդվածների 1-ին մասերով։ Հաջորդ դատական նիստը նշանակված է մարտի 9-ին։ Սեդա Ղուկասյան