Անկախ նրանից՝ ով ինչ է ծխում, անտրամաբանական էր. Վիգեն Սարգսյան

Պաշտպանության նախարար Վիգեն Սարգսյանն այսօր կառավարության նիստին զեկուցեց զինծառայողներին ծխախոտ չտրամադրելու մասին նախագիծը, որը երեկվանից բուռն քննարկվում էր։ Ինչպես ասաց՝ պայմանագրային զինծառայողներին ծխախոտի փոխարեն գումար տրամադրելու  նախագիծն անհիմն մեծ աղմուկ է բարձրացել: «Խոսքը վերաբերում է ոչ թե ժամկետային, այլ պայմանագրային զինծառայողներին, որովհետև ժամկետային զինծառայողները ծխախոտ չեն ստացել այսպես, թե այնպես։ Պայմանագրային զինծառայողներին հաշվարկվել է օրեկան մեկ տուփ ծխախոտ՝ մարտական դիրքերում գտնվելու ընթացքում»,-ասաց Սարգսյանը: «Պայմանագրային զինծառայողներին հաշվարկվել է օրական 1 տուփ ծխախոտ մարտական դիրքերում գտնվելու ընթացքում, որը մեր գնահատմամբ չի տեղավորվել ե՛ւ մեր ընդհանուր քաղաքականության, ե՛ւ տրամաբանության մեջ, որովհետեւ նույն տիպի ծխախոտ, անկախ նրանից, թե մարդը ծխող է կամ ոչ, եւ անկախ նրանից, թե ինքն առհասարակ ինչ է ծխում: Դրա համար մենք առաջարկեցինք այդ նույն գումարը, որը տրամադրվել է ծխախոտ ձեռքբերելու համար ավելացնել նրանց կողմից ավելացվող հավելավճարի մեջ, որպեսզի նրանք, ովքեր չեն ծխում՝ չխրախուսվեն ծխելու հարցում»,- ասաց պաշտպանության նախարարը՝ նշելով, որ ծխող զինվորականներն էլ այդ գումարով կկարողանան ընտրել իրենց համար նախընտրելի ծխախոտը եւ կամ այլ նպատակով օգտագործել այդ գումարը: Վիգեն Սարգսյանը անդրադարձավ նաեւ մամուլում այս հարցի շուրջ ծավալված քննարկումներին: «Երեկ շատ հետաքրքիր էր հետեւել, թե ինչպես այս թեման դարձավ զինվորից ծխախոտ խլելու կամ այդ գումարն այլ նպատակներին ուղղելու եւ այլ թեմա: Իհարկե, այսպիսի բան գոյություն չունի»,- ասաց նախարարը: Նախագիծն ընդունվեց միաձայն։