Հիմնական ապակայունացնող գործոն է Ադրբեջանի ներկայիս կառավարող վարչակազմը

«Ռիա-նովոստի»-ին տված հարցազրույցում  ՀՀ պաշտպանության նախարար Վիգեն Սարգսյանը հայտարարել է,որ Հայաստանն «Իսկանդեր» հրթիռային համակարգերը գործարկելու որոշում կընդունի՝ կախված իրավիճակի զարգացումից: «Ես կարող եմ ձեզ ցույց տալ ալգորիթմը: Այդ զենքի գործառույթը և պարամետրերը թույլ են տալիս անուղղելի վնաս հասցնել երկրի ենթակառուցվածքներին, ում դեմ այն կարող է կիրառվել: Համապատասխանաբար, «Իսկանդեր»-ների կիրառման որոշումը սերտորեն կապված կլինի իրավիճակի զարգացումից: Ամեն դեպքում, մենք այն դիտարկում ենք որպես զենք՝ երաշխավորված հարվածի համար, եթե նման անհրաժեշտություն լինի: Դա, առաջին հերթին, զսպող զենք է: Ակնհայտ է, որ իրավիճակի զարգացումը կարող է թելադրել նման մոտեցումների դիտարկում, բայց սկզբունքորեն, իր գաղափարախոսությամբ, հնարավորություններով այդ զենքն այնպիսին է, որը պետք է յուրաքանչյուր տաք գլուխ սառեցնի որոշումների ընդունման ժամանակ»,- ընդգծել է ՀՀ պաշտպանության նախարարը: Մասնավորապես հնարավոր սրացման մասով ՀՀ Պնախարարը նկատել է, որ Չեխովի հայտնի խոսքերը ոչ ոք չի կարող հերքել, թե երբ առաջին գործողությունում պատից հրացան կա կախված ապա դա երկրորդ գործողությունում անպայման կկրակի: Սակայն իրական վտանգը ըստ Վիգեն Սրագսյանի ոչ այնքան զենքի քանակի եւ տեսակների մեջ է, որքան դրանց կառավարման: Կայունությունն ու անվտանգությունը ցանկացած ռեգիոնում հնարավոր է ապահովել միայն իշխանության ժողովրդավարական ինստիտուտների միջոցով: “Ես կարծում եմ, որ Հարավային Կովկասում կայունության եւ անվտանգության հիմնական սպառնալիքը այն կառավարումն է, որը կա այսօրվա Ադրբեջանում: Այնտեղ իսպառ բացակայում են ժողովրդավարական այն ինստիտուտները որոնք անհրաժեշտ են դեմոկրատական երկրներում սպառազինությունների վերահսկման համար, իսկ այդ դեպքում արդեն անկարեւոր է, թե որքան զենք կա կամ ինչ տեսակի, այնտեղ”,- մասնավորապես ասել է Վիգեն Սարգսյանը: Վիգեն Սարգսյանը նշել է, որ նման պետություններում հաճախ ներպետական եւ ներքաղաքական խնդիրները կարող են տհաճ զարգացումների բերել եւ զենքի հանդեպ վերահսկողությունը հայտնվի լրիվ այլ մարդկանց ձեռքում: Այս պայմաններում միշտ էլ սրացման վտանգ կա: