«Ժամանակ». Արման Սահակյանը թաղային հեղինակություններին պաշտոնների խոստում է տալիս

«Ժամանակ» թերթը գրում է. «ՀՀԿ-ի ցուցակով, ռեյտինգային ընտրակարգով Աջափնյակ, Դավթաշեն, Արաբկիր վարչական շրջաններն ընդգրկող թիվ 2 ընտրատարածքում առաջադրված ԱԺ նախագահ Գալուստ Սահակյանի որդին՝ ՀՀ կառավարությանն առընթեր պետական գույքի կառավարման վարչության պետ Արման Սահակյանը, դեռ պատգամավոր չդարձած՝ թաղային հեղինակություններին պաշտոնների խոստումներ է տալիս։ Աջափնյակում վերջինիս աջակցում է հայտնի թաղային հեղինակություն Գրիգոր Գրիգորյանը՝ մեկ այլ հեղինակություն Սերգեյ Գրիգորյանի (Ֆազի) եղբայրը։ Արման Սահակյանը Գրիգոր Գրիգորյանին՝ Գարիկին, իր ընտրվելու պարագայում խոստացել է Աջափնյակի թաղապետի պաշտոնը, որն այժմ զբաղեցնում է ՀՀԿ խմբակցության ղեկավար Վահրամ Բաղդասարյանի փեսան՝ Արտավազդ Սարգսյանը։ Ի դեպ, Արման Սահակյանը, բացի թաղային հեղինակություններից, գործի է դրել նաեւ Աջափնյակի առավել ակտիվ քաղաքացիներին։ Ամեն շենքի 2 մուտքում քաղաքացիների հետ աշխատանք տանելու, անձնագրի տվյալները վերցնելու եւ իր օգտին քվեարկելու խոստման դիմաց տալիս է 60.000-70.000 դրամ, իսկ բուն քվեարկողներին՝ առայժմ 10.000 դրամ»: Առավել մանրամասն՝ թերթի այսօրվա համարում